Oqaaseqaammi nutaami ombudsmandimit nalilerneqarpoq, Kommune Qeqertalik allagaatinik takunnikkumalluni noqqaassummik pisarialimmik nukingiussilluni suliarinnissimanngitsoq.  

Peqatigiiffiup sullitani sinnerlugu 17. august 2023-mi, sullitami qitornai pillugit kommunip suliamut allagaataanik takunnikkumalluni kommune noqqaavigivaa.

Allagaatinik takunninnissamut noqqaassummut kommune akuersaarluni 8. december 2023-mi aalajangiivoq, kommunimiillu suliami allagaatit tamakkerlugit tunniunneqarlutik. Kukkunikkulli kommunimit suliami allagaatit kukkusut peqatigiiffimmut tunniuttoorneqarput.

Peqatigiiffimmit tamanna Datatilsynimut nalunaarutigineqarpoq.

Kommune peqatigiiffimmut nutaamik 18. april 2024-mi aalajangiissuteqarpoq, aalajangiinermullu ilanngullugit suliami allagaatit eqqortut tunniunneqarlutik.

Kommunip qaammatini arfineq-pingasuni piffissaq suliap suliarineqarneranut atugaa ombudsmandimit isornartoqartinneqarpoq.

Ombudsmandip oqaaseqaataa uani atuarsinnaavat.

Annertunerusumik paasisaqarusukkuit saaffiginniffissaq: 32 78 10.

Allagaatinik takunnikkumalluni noqqaassuteqarnermi piffissaq suliap suliarineqarneranut atorneqartoq

Pisortat ingerlatsineranni suliassat suliarineqartarnerat pillugu inatsisip  § 16, imm. 2-ata malitsigivaa, oqartussaasut piaartumik aalajangissagaat qinnuteqaat akuerineqarsinnaanersoq.

Qinnuteqaat oqartussaasunit tiguneqarnermi kingorna ullut qulit qaangiutinnginnerani akuerineqanngippat itigartitsissutaappalluunniit oqartussaasut qinnuteqartoq tamatumunnga pissutaasumik kiisalu aalajangiinerup qaqugu tusarliutissanganeranik nalunaarfigissavaat.

Aalajangersakkap oqaaseqaatitaanit erserpoq, pisortat oqartussaasuinut tatiginninnermut pingaaruteqartoq, pineqartup sapinngisamik piaartumik allagaatinik takunninnissaa.