Innuttaasup naammagittaalliutaa tunngavigalugu, meeqqat angerlartinneqarnissaat pillugu noqqaassummik Kommuneqarfik Sermersooq akissuteqarsimannginnera pillugu suliamik ombudsmandi suliaqarpoq. 

Kommunimit 25. november 2022-mi aalajangerneqarpoq meeqqat angerlarsimaffiup avataanut inissinneqassasut. Meeqqat 2. december 2022-mi inissinneqarput. Meeqqat angajoqaatik jullimi najorpaat. Tamatumalu kingorna meeqqat ataataminni najugaqaannarlutik.

Ataataasoq 2. februar 2023-mi qitornami angerlartinneqarnissaat pillugu kommunimut noqqaassuteqarpoq.

Kommune 10. maj 2024-mi meeqqat angerlartinneqarnissaat pillugu aalaja-ngiivoq.

Ombudsmandi oqaaseqaammi inerniliissuteqarpoq akuerineqarsinnaanngitsoq inissiineq pillugu kommunip aalajanginera atuutitinneqanngimmat, kiisalu aamma meeqqat angerlartinneqarnerat sioqqullugu kommunimit aalajangiisoqaqqaarsimannginnera. Ukioq ataaseq qaangiutereersoq aatsaat meeqqat angerlartinneqarnissaat pillugu kommunip aalajangiinera akuerineqarsin-naanngilaq. Tassunga atatillugu meeqqat angerlartinneqarnissaat pillugu ukioq ataaseq qaangiutereersoq aatsaat kommunip aalajangiinera akuerineqarsinnaanngitsutut isigaara.

Naggataatigullu ombudsmandimit isorisarialittut isigineqarpoq, kommunip meeqqat pillugit sukumiisumik ataasiakkaarlugit naliliiffigisimanngimmagit, meeqqat angerlartinneqarnissaat pillugu immikkut aalajangiinermik naammagittaalliorsinnaanermut ilitsersuutitalimmik.

Ombudsmandi naliliivoq suliami annertuumik kukkussuteqartoqarsimasoq sumiginnaasoqarsimasorlu, ombudsmandi pillugu inatsimmi § 23 tunngavigalugu  Inatsisartut Inatsisinut Ataatsimiititaliaat aamma kommunalbestyrelsi oqaaseqaat pillugu nalunaarfigaakka.

Ombudsmandip oqaaseqaataa uani atuarneqarsinnaavat

Annertunerusumik paasisaqarusukkuit attavissaq: oqarasuaat 327810.

Inissiineq angerlartitsinerlu

Angerlarsimaffiup avataanut inissiisarnermi malittarisassat Meeqqat tapersersorneqarnissaannut inatsimmi § 27-mi aamma § 28-mi nalimmassagaapput, tassuunakkut meeraq akuersissutitalimmik imaluunniit akuersissutitaqanngitsumik angerlarsimaffiup avataanut inissinneqarsinnaavoq. 

Angerlarsimaffiup avataanut inissiineq unitsinneqassaaq meerarlu angerlartinneqarluni, inissiinermi siunertarineqartoq anguneqarpat, inissiineq tunngavigisamut siunertaaruppat, imaluunniit meeraq 18-inik ukioqalerpat,  suliniuteqareernermi malitseqartitsinissamik aallartitsisoqarnissaanik aalajangiisoqanngippat. Meeqqat tapersersorneqarnissaannut inatsimmi § 40 tamanna ersersinneqarpoq.

Meeqqat tapersersorneqarnissaannut inatsisip § 41-ata malitsigivaa, angerlarsimaffiup avataani inissiinerup atorunnaarsinneqarnissaa pillugu kommunalbestyrelsip aalajangiinissaa sioqqullugu, kommunalbestyrelsip qulakkeersimassavai, angajoqqaatut oqartussaassusillip meeqqap pisariaqartitaanik naammassinnissinnaanera, meeqqamik oqaloqatiginnittoqarsimanera, kiisalu iliuusissamik pilersaarutip suliarineqarsimanissaa.

Angajoqqaatut oqartussaassusilik noqqaassuteqarpat meeqqap angerlartin-neqarnissaanik, kommune aalajangiissaaq angerlartitsinissamik imaluunniit akuersissutitaqanngitsumik angerlarsimaffiup avataanut inissiinermik.

Piffissaq suliap suliarineqarneranut atorneqartoq

Meeqqat tapersorneqarnissaannut inatsimmi malittarisassaqanngilaq kommunip angerlartitsinissamik suliaqarnerani piffissaq suliap suliarineqarneranut atorneqartoq pillugu.

Taamatullu aamma pisortani piffissaq suliap suliarineqarneranut atorneqartoq pillugu aalajangersaasoqarnikuunngilaq suliat suliarineqartarnerat pillugu inatsimmi inatsisiniluunniit allani. 

Ingerlatsinermi pissuserissaarneruvoq sapinngisamik piaartumik isumannaatsumillu suliat suliarineqartarnissaat.

2019-2-mi ombudsmandip oqaatigivaa, suliami 2019-2-tut ittumi, angajoqqaatut oqartussaassusilik meeqqamik akuersissutitalimmik inissitamik  angerlartitsinissamik noqqaassuteqarnermi, kommune isummertariaqaraluarpoq, noqqaassut akuerineqassanersoq sapaatip akunnialuisa imaluunniit qaammatilialuit iluanni.

Meeqqat naammagittaalliuteqarsinnaatitaanerat

Meeqqat tapersorneqarnissaannut inatsimmi § 60, imm. 2 malillugu meeqqat suliani imminnut tunngasuni naammagittaalliorsinnaatitaapput. Aalajangersagaq taanna ilanngunneqarpoq meeqqat pisinnaatitaaffii qulakkeerniarlugit, FN-´ip meeqqat pillugu isumaqatigiissutaat malillugu.

Tassani aallaaviuvoq meeraq kinaluunniit ukiui apeqqutaatinnagit naammagittaalliorsinnaatitaammat.

Aalajangersakkap oqaaseqaatitaanit ersersoq, kommunip ingerlatsiviata naammagittaalliorsinnaanermut ilitsersuummi qulakkeerinniffigissagaa, kommunimi ingerlatsiviup meeqqap naammagittaalliorsinnaaneranik ilitsersuummi qulakkeertariaqarpaa suliani tamani ersarissumik meeqqamut ataatsimut tunngasuinnarmik nalilersuisarnissaq, meeqqap naammagittaalliortup kingunerisinnaasai pillugit paasinninnissaminut naammattumik inerisimanera eqqarsaatigalugu.