Meeqqat inuusuttullu naammagittaalliorfissaat
Ombudsmandi inatsisilerituujuvoq ateqarlunilu Gedion Jeremiassen.
Ombudsmandeqarfimmi meeqqanut tunngasuni attaveqarfigineqartartut tassaapput Gedion Jeremiassen aamma Maliina L. Hansen.
Namminersorlutik Oqartussat kommunillu inatsimmik malinninnersut Ombudsmandip nakkutigisaraa.
Ombudsmandip suliaata annersaa inunnit naammagittaalliortoqarneratigut pisarpoq. Assersutitut taaneqarsinnaapput kommunip meeqqanut inuusuttunullu tunngasuni innarluutilinnulluunniit tunngasuni inatsimmi malittarisassanik imaluunniit nunat tamat isumaqatigiissutaannik, soorlu FN-ip Meeqqat pillugit Isumaqatigiissutaanik malinninnginnera pillugu naammagittaalliortoqarnera.
Suliaq sukumiinerusumik misissorneqassasoq Ombudsmandi nammineq aamma aalajangersinnaavoq. Soorlu aviisimi allassimasoqarpat Ombuds-mandip misissorneqartariaqartutut isigisaanik.
Ombudsmandi paaqqinniffinnut/suliffeqarfinnut misissuiartorluni pulaartarpoq/tikeraartarpoq. Soorlu børnehjemmimut. Taamatut pulaarnermi/tikeraarnermi Ombudsmandip assigiinngitsut arlallit misissortarpai, soorlu børnehjemmip illutaa ineeqqallu. Ombudsmandip sulisut meeqqallu qanoq innersut aamma apersortarpai.
MIO (Meeqqat Illersuisuat) Ombudsmandip aamma suleqatigisarpaa.
Kikkulluunniit Ombudsmandimut naammagittaalliorsinnaapput. Qassinik ukioqarnerit apequtaanngilaq. 18-inik ukioqalersimanngikkaluaruilluunniit naammagittaalliorsinnaavutit. Suminngaanneernerit sumilu najugaqarnerit aamma apeqqutaanngilaq. Danmarkimi najugaqaraluaruilluunniit aam-ma naammagittaalliorsinnaavutit.
Allanut naammagittaalliornissamut periarfissatit atoreersimagukkit Ombudsmandip aatsaat ikiorsinnaavaatit. Soorlu kommunivit aalajangiinera Isumaginninnermi Naammagittaalliuuteqartarfimmut naammagittaalliuutigisinnaagukku Ombudsmandimut naammagittaalliunnginninni tassunga naammagittaalliussaatit. Imaluunniit kommunimi sulisoq naammagittaalliuutiginiarukku Ombudsmandimut naammagittaalliunnginninni borgmesterimut naammagittaalliussaatit.
Naammagittaalliorfiginiakkavit attaveqarfiginiarnerani tamanna pisariaqartikkukku Ombudsmandip ikiorsinnaavaatit.
Soorlu ikinngutitit, niuertarfik, politiit eqqartuussivilluunniit pillugit naam-magittaalliuutit Ombudsmandip suliarisinnaanngilai.
Ombudsmandip ikiorsinnaaneraatit nalornigaluaruilluunniit Ombudsmandimut saaffiginnissinnaajuaannarputit.
- Kommunimi sullissisuit attaveqarfiginiarnissaanut.
- Attaveqarfigisassap eqqortup attaveqarfiginiarnerani. Soorlu naammagittaalliuutit Ombudsmandip kommunimut ingerlateqqillugu nassiussin-naavaa.
- Sunik kissaateqartutit kommunip paasitinniarnissaanut – kommunip akissuteqarfigineraatit Ombudsmandip ilaanneeriarluni nakkutigissassavaa.
- Klassimut allamut nuussasutit atuarfiup pisortaasa aalajangiinerat iluarinngikkukku.
- Innarluuteqaruit pisariaqartitattullu aamma pisinnaatitaaffigisattut kommunimit ikiorneqanngikkuit.
- Angerlarsimaffiup avataanut inissinneqarsimaguit assigiinngitsutigut ikiorsinnaavaatit:
- Kommuni iliuusissanut pilersaarusiortillugu, soorlu taamaalillutit qanoq sivisutigisumik inissinneqarsimassasutit pilersaarutaasoq paasisinnaaniassagakku.
- Inissinneqarfissattut kommunip aalajangigaa iluarinngikkukku allameerusunnerullutillu.
- Angajoqqaannut ilaquttannullu attaveqarnerorusukkuit.
Ombudsmandip ikiorsinnaaneraatit nalornigaluaruilluunniit Ombudsmandimut saaffiginnissinnaajuaannarputit.
Kinaassutsit oqaatiginagu Ombudsmandimut sianersinnaavutit, taava Ombudsmandip sunik periarfissaqarnersutit oqaluttuussinnaavaatit.
Ombudsmandimut naammagittaalliussaguit kinaassutsit/qanoq ateqarnerit, angajoqqaatit nakkulliisorisalluunniit qanoq ateqarnersut sumilu najugaqarnerit oqaatigisariaqarpatit. Naammagittaalliuutit Ombudsmandip suliarisinnaassaguniuk paasissutissat taakku atussavai, soorlu oqartussaasoq (atuarfiit kommuniluunniit) naammagittaalliuutigisat attaveqarfigissaguniuk.
18-iliisimanngikkuit naammagittaalliuutillu suliariniarlugu aalajangeruni Ombudsmandip angajoqqaatit nakkutilliisulluunniit attaveqarfigissavai, naammagittaalliuutillu taakkununnga oqaluttuaralugu.
Oqartussaasoq naammagittaalliuutigisat (soorlu atuarfiit kommuniluunniit) naammagittaalliorsimasutit sunalu naammagittaalliuutigisimagit Om-budsmandip aamma oqaluttuutissavaa. Naammagittaalliuutit Ombudsmandip oqartussaasumut apeqquteqarnermigut misissussavaa. Taamaattumik kina naammagittaalliorsimasoq sunalu naammagittaalliuutigineqarsimasoq Ombudsmandip oqaluttuarisinnaassagaa pisariaqarpoq.
Ombudsmandimut sianersinnaavutit. Allaffimmut aamma aqqusaarsinnaavutit sunalu naammagittaalliuutiginiarnerit oqaluttuaralugu. Piumaguit ikinngutivit arlaat inersimasorluunniit ilagisinnaavatit. Aamma sianersinnaavutit, oqaloqatiginninnissamullu piffissamik pillutit.
Ombudsmandip telefonia 32 78 10-mik normoqarpoq.
Ombudsmandi uaniippoq: Noorlernut 53, Postboks 1606, 3900 Nuuk.
Piffissani ukunani allaffiup ammanerani ornigulluni oqarasuaatikkulluunniit saaffiginninnissamut periarfissaqarpoq:
Ataasinngorneq: 10.00-14.00
Marlunngorneq: 10.00-14.00
Pingasunngorneq: Matoqqavoq
Sisamanngorneq: 10.00-14.00
Tallimanngorneq: 10.00-14.00
Ombudsmandip e-mailia post@ombudsmand.gl (isumannaallisagaanngitsoq).
Ombudsmandimut sianersinnaavutit, imaassinnaavoq inersimasumit MIO-meersumilluunniit (Meeqqat Illersuisuanneersumit) ikiorneqarlutit. Imaassinnaavoq allallutit naammagittaallioqqullutit Ombudsmandip qinnuigigaatit. Ombudsmandip allaffianukarsinnaavutit naammagittaalliuutivillu allannerani ikiortillutit.
Naammagittaalliuutit Ombudsmandimut tunniussinnaavat nassiussinnaalluguluunniit. Immersugassaq Ombudsmandip nittartagaaniittoq aamma atorsinnaavat naammagittaalliuutilluunniit assammik allallugu. Najukkavit allakkanik nassiussiviusinnaasup allannissaa naammagittaalliuutillu assammik atsiornissaa eqqaamassavat.
Naammagittaalliuutit e-mailikkut nassiunniarukku assammik atsiussavat, naammagittaalliuutillu assammik atsiugaq assilillugu (scannerlugu) mailimut kakkiullugu nassiutissallugu. Eqqaamaannassavat Ombudsmandi e-mailinik isumannaatsuunngitsuinnarmik (kryptererneqanngitsuinnarnik) nassiussisinnaammat nassinneqarsinnaallunilu (tassa imaappoq e-mailit ilinniinnaq Ombudsmandiinnarmillu atuarneqarsinnaasunngortinneqarsinnaanngillat). Taamaattumik saaffiginnissutit Ombudsmandip allakkatigut allakkerisarfikkoortitatigut akissavaa sianerfigalutilluunniit.
Angajoqqaatit nakkutilliisulluunnit illit sinnerlutit aamma naammagittaalliortissinnaavatit.
Tassa imaappoq oqartussaasoq suna (soorlu atuarfiit kommuniluunniit), inuk kina aalajangiinerluunniit suna aamma sooq naammagittaalliuutiginiarnerit illit nammineq oqaatigerusutattut allassavat.
Naammagittaalliuutinni makku allassavatit:
- Atit, najukkat oqarasuaativillu normua.
- Angajoqqaavit nakkutilliisuilluuinniit aqqi, najugaat oqarasuaataasalu normui.
- Suna, kina aalajangiinerluuniit suna naammagittaalliuutiginiarnerlugu.
- Oqartussaasoq suna (soorlu atuarfiit, kommuni imaluunniit Namminersorlutik Oqartussat) inulluunniit kina naammagittaalliuutigalugu.
- Susoqarsimanera naatsumik oqaluttuaralugu.
- Naammagittaalliuutigisat sooq iluarinngikkit naatsumik oqaluttuaralugu. Soorlu atuarfippit kommunilluunniit aalajangiinera kukkusuusoq sooq isumaqartutit.
Atuarfinniit kommunimiilluunniit allakkanik naammagittaalliuutiginiakkannik tigusaqarsimaguit taakkua assilineri naammagittaalliuutinnut ilanngullugit nassiukkukkit pitsaanerpaassaaq, taamaalilluni atuarfik kommuniluunniit qanoq allassimanersoq Ombudsmandip takusinnaaniassammagu.
Eqqaamallugu naammagittaalliuutit assammik atsiussagakku. Kinaassutsimik isertuussilluni naammagittaalliuutit Ombudsmandip suliarineq ajorpai.
Suli 18-inik ukioqalersimanngikkuit naammagittaalliuutillu suliariniarlugu aalajangeruni Ombudsmandip angajoqqaatit nakutilliisulluunniit attaveqarfigissavaa, naammagittaalliuutillu oqaluttuaralugu.
Oqartussaasoq naammagittaalliuutigineqartoq (soorlu atuarfiit kommunilluunniit) Ombudsmandip attaveqarfigigajuttarpaa, suliaq pillugu qanoq oqaasissaqarnersoq tusarniarlugu. Ombudsmandip oqartussaasoq apeqquteqarfigisinnaavaa, qinnuigaluguluunniit sooq taamatut aalajangiisimanersoq nassuiaqqullugu, aalajangiineq taanna illit naammagittaalliuutigigukku.
Ombudsmandip naammagittaalliuutit allakkatigut suliarisarpai. Allakkat Ombudsmandip oqartussaasumut naammagittaalliuutigisannut (soorlu atuarfinnut kommunimulluunniit) allagaasa assilineri ilinnut aamma nassiunneqartassapput.
Inatsit malinneqarsimanersoq Ombudsmandip misissussavaa. Ombudsmandip misissuinini naammassiguniuk isummani pillugu allagaqassaaq. Ombudsmandip isummani pillugu allagai Ombudsmandip oqaaseqaataanik taaneqartarput.
Oqartussaasoq (soorlu atuarfiit kommuniluunniit) suliami ilinnut tunngasumi kukkussuteqarsimasoq Ombudsmandi isumaqaruni tamanna oqaaseqaammini allassinnaavaa. Ombudsmandip oqartussaasoq nutaamik aalajangeeqqullugu aamma qinnuigisinnaavaa. Ombudsmandi nammineq suliami aalajangiisinnaanngilaq.
Ombudsmandi naammagittaalliuutinnik suliarinninniarluni aalajangersimagaluaruniluunniit naammagittaalliuutinnik misissuinini unitsissinnaavaa. Taamatut pisoqarpat Ombudsmandip allat suliamik ilinnut tunngasunik suliarinnissinnaasut attaveqarfiginiarnerini sapinngisaminik ikiussavaatit. Aamma imaassinnaavoq oqartussaasoq (atuarfiit kommuniluunniit) naammagittaalliuutigisat nutaamik aalajangiiniarluni aalajangertoq. Taamaalisoqarpat Ombudsmandip naammagittaalliuutinnik suliarinninnissaa pisariaarutissaaq.
Ombudsmandi naammagittaalliuutinnik suliarinninniarani aalajangeruni ingerlariaqqinnissanni ikiussavaatit, sumullu saaffiginnissinnaaninnik oqaluttuullutit. Imaassinnaavoq kommunimi sullissisunnut, kommunimut, MIO-mut (Meeqqat Illersuisusuannut) allarluinnarmulluunniit saaffiginnissinnaasutit. Inuup soorlu atuarfinni kommunimiluunniit saaffigisinnaasavit attaveqarfiginiarnerani Ombudsmandip aamma ikiorsinnaavaatit.
MIO (Meeqqat oqaaseqartartuat) ulluinnarni ullut tamaasa nal. 10-15-imi oqarasuaammut 346940-mut sianerfigisinnaavat. MIO-p allaffia Qullilerfik 2, nr. 801-2-mi Nuummiittumiippoq. MIO-p nittartagaa www.mio.gl aamma alakkarsinnaavat imaluunniit Mio.gl Facebookemi malinnaaffigisinnaallugu.