Ingerlatsinermik inatsiseqartitsinermi qitiusumik pingaarutillit arlallit oqartussaasunut ilitsersuutikkut saqqummiunneqarput. Malittarisassat arlallit inatsisini nalunaarutinilu aalajangersarneqarsimanitik pissutigalugit malinneqartussaapput, malittarisassalli allat ingerlatsinermi ileqqorissaarnermi malitittarisassanik tunngavinnillu inatsisikkut aalajangersagaanngitsunik/allassimanngitsunik tunngaveqarnertik pissutigalugu malinneqartussaallutik malittariaqarlutilluunniit. Malittarisassat tunngaviillu taakku eqqartuussivinnit ineriartortitaapput, atuakkiani allaaserineqarsimallutik Ombudsmandillu sulinerani ukiut ingerlaneranni atorneqarsimallutik.

Oqartussaasunut ilitsersuutip malittarisassat, inatsisilerinikkut atuakkiat Ombudsmandillu oqaaseqaatai suliamut attuumassuteqartut imminnut ataneqartilerpai.

Oqartussaasunut ilitsersuut Namminersorlutik Oqartussat kommunillu qitiusumi qitiunngitsumilu ingerlatsiviini pisortaasunit sulisunillu – ilinniartitsinermi ulluinnarnilu sulinermi sakkutut – atorneqarsinnaasutut eqqarsaatigineqarpoq.

Oqartussaasunut ilitsersuutip tamanit iserfigineqarsinnaasunngortinneqarneratigut pisinnaatitaaffiit pillugit paasissutissarsiorfittut ilitsersuutitullu innuttaasunit atorneqarsinnaanera aammattaaq eqqarsaatigineqarpoq.

Oqartussaasunut ilitsersuut 12-inik immikkoortortalerlugu suliarineqarpoq. Immikkoortut imminnut attuumassuteqartinnagit atuarneqarsinnaapput, innersuus-sutimmi assigiinngitsut immikkoortuni ataasiakkaani ikkussuunneqarsimammata:

Imai:

• Immikkoortoq 1 –  Ingerlatsinermi ileqqorissaarneq
• Immikkoortoq 2 –  Piffissaq suliamik suliarinninnermut atorneqartoq
• Immikkoortoq 3 –  Aalajangiinermik oqartarneq
• Immikkoortoq 4 –  Tunngavilersuisarneq
• Immikkoortoq 5 –  Oqartussaasut paasissutissanik pisariaqartunik peqartussaanerat
• Immikkoortoq 6 –  Suliami illua’tungiusup sinniisoqartarnera
• Immikkoortoq 7 –  Suliami illua’tungiusumik oqartarneq
• Immikkoortoq 8 –  Suliami illua’tungiusup isumaanik tusarniaasarneq
• Immikkoortoq 9 –  Ilitsersuisussaatitaaneq
• Immikkoortoq 10 – Oqartussaasumi sulianik suliarinninnermi peqataasinnaassuseqannginneq
• Immikkoortoq 11 – Allattuisussaatitaaneq
• Immikkoortoq 12 – Nalunaarsuisarneq

Immikkoortut tamarmik ataatsimut ilitsersuummik kiisalu eqikkaavimmik “Naatsumik oqaatigalugu”-mik taaneqartumik imaqarput.

Immikkoortut tamarmik suliassaqarfimmi pineqartumi oqaaseqaatigisartakkannut innersuussutinik aamma atuakkiatigut tunuliaqutaasut pillugit immikkoortumik imaqarput.