Allagaatinik paasitinneqarumalluni qinnutigisamik itigartitsinermut inatsisikkut tunngavissaqanngilaq

Naalakkersuisut 2016-imi nuna tamakkerlugu pilersaarut pillugu nassuiaat Inatsisartut ukiakkut ataatsimiinneranni oqaluuserisassanit tunuartippaat.

A Aningaasaqarnermut Akileraartarnermullu Naalakkersuiusoqarfiup (tamatuma kingornatigut Naalakkersuisoqarfimmik taaneqartartussap) allaffigeqatiginnittarnerani allagarisaasimasunik paasitinneqarumalluni qinnuteqaateqarpoq, Naalakkersuisoqarfimmiilli imaattumik tunngavilersugaasumik itigartinneqarluni:

“Paasitinneqarsinnaatitaaneq pillugu inatsimmi § 10, nr. 1-ikkut aalajangersarneqarpoq allagaatit Naalakkersuisut ataatsimiinnerini atugassatut oqartussaasumit suliarineqartut paasitinneqarsinnaatitaanermi pineqartunut ilaatinneqanngitsut. Naalakkersuisut politikikkut aalajangiiniarnermi periaasiinik illersuineq aalajangersakkap taassuma siunertaraa.

Allagaatit taaneqartut Naalakkersuisut Siulittaasuata aamma Aningaasaqarnermut Naalakkersuisup ataatsimiinneranni atugassatut suliarineqarsimapput, 2016-imilu nuna tamakkerlugu pilersaarusiaq pillugu nassuiaatip Inatsisartut ataatsimiinneranni oqaluuseri-sassanit peerneqarnera ataatsimiinnerup taassuma inerneraa.

Allagaatinik ilaatitsinngitsoortussaatitaaneq Naalakkersuisoqarfiup paasitinneqarsinnaatitaaneq pillugu inatsimmi § 11 tunngavigalugu naliliiffigaa, § 11-kkullu aalajangersarneqarpoq paasissutissat suliami pissutsinut annertuumik pingaaruteqartut tunniunneqassasut, allagaatip § 10, nr. 1-imi pineqartunut ilaatinneqarnera apeqqutatinnagu. Naalakker-suisoqarfik naliliivoq allagaatit paasissutissanik suliami pissutsinut annertuumik pingaaruteqartunik imaqanngitsut.”

Naalakkersuisoqarfiup inatsisilerinikkut naliliinera Inatsisartut Ombudsmandiata isumaqatiginngilaa, tamatumunngalu peqatigitillugu oqaatigalugu Naalakkersuisoqarfiup aalajangiinermini allagaatinik annertusisamik paasissutissiisarnermik periaaseq tunngavigalugu akuersaarneqarsinnaanersoq isummerfigisimasariaqaraluaraa.

Ombudsmandip inassuteqaatigaa Naalakkersuisut suliaq oqaaseqaatini oqaatigineqartut isiginiarlugit suliareqqissagaa.

Inatsisartut Ombudsmandiata Naalakkersuisoqarfik tamatuma saniatigut qinnuigaa oqaaseqaat Naalakkersuisoqarfiup qanoq iliuuseqarnissaanut pissutissaqalersitsinersoq ilisimatitsissutigeqqullugu.

Ombudsmandip oqaaseqaataa uani atuarsinnaavat.

Malitseqartitsiviginninneq:

Allagaatinik paasitinneqarumalluni qinnutigisaq Naalakkersuisoqarfiup 6. april 2018-imi akueraa allagaatillu piumaneqartut tunniullugit. Ombudsmandi suliamut atatillugu annertunerusumik iliuuseqaqqissanngilaq.

Sukumiinerusumik paasisaqarusukkuit 32 78 10-mut sianersinnaavutit.

Tunuliaqutaa:

Pisortat ingerlatsinerat pillugu paasitinneqarsinnaatitaaneq pillugu Inatsisartut Inatsisaanni nr. 9-mi, 13.juni 1994-imeersumi § 10 imm. 1 aamma § 4 imaattunik oqaasertaqarput:

Ӥ 10. Paasitinneqarsinnaatitaanermut ilaatinneqanngillat:

1) Naalakkersuisut ataatsimiinnerinit imaqarniliuinerit allakkiallu allat oqartussamit ataat-simiinnerni taamaattuni atugassanngorlugit suliarineqartut.”

“§ 4. §§ 7-14-imi ilaatinneqanngitsutut taaneqarsimasut saniatigut allakkianik ingerlatsinermut oqartussaasumi allaffikkoortumik suliassamik ingerlatsinermut atatillugu apuussimallutilluunniit suliarineqarsimasunik paasitinneqarumalluni kinaluunniit piumasaqarsinnaavoq. Ingerlatsinermut oqartussaq annertunerusumik paasissutissiisinnaavoq nipangiussisimasussaatitaaneq il.il. pillugit malittarisassat allanik aalajangersaasimanngippata.”