Oqartussaasup aalajangiinnginnermini suliaq tamatigut misissoqqaartussaavaa. Tamatuma saniatigut oqartussaasup suliaq misissorniarlugu qanoq iliornissaa inatsisiliornermi malittarisassani erseqqinnerusumik aalajangersarneqarsimasinnaavoq. Soorlu suliami immikkut soqutigisaqartut suliami aalajangiisoqannginnerani oqaaseqaateqarnissaminnut periarfissaqartinneqassapput.

Angajoqqaarsiat suliami angerlartitsinermut tunngasumi suliami illua’tungiunngillat. Kisianni meeqqat inuusuttullu pillugit peqqussummi malittarisassakkut aalajangersarneqarpoq kommunip angajoqqaarsiat taakkualu kommuni uninngavigisaat meerarsiap angerlartinneqarneranut atatillugu oqaaseqaateqarnissaannut periarfississagai.

Suliami meerarsiamik angerlartitsinermut tunngasumi Inatsisartut Ombudsmandiata oqaatigaa kommunip suliaq amigartumik paasissutissartalersorsimagaa, taamatuttaarlu meeqqat inuusuttullu pillugit peqqussummi suliami illua’tungiusup isumaanik tusarniaasarneq pillugu malittarisassaq kommunip malissimanagu.

Ombudsmandip tamatuma saniatigut tikkuarlugu oqaatigaa kommunip angajoqqaarsiat kommunitut uninngavigisaannik oqarasuaatikkut ataatsimeeqateqarnini pillugu imaqarniliorsimannginnera ingerlatsinermi ileqqorissaarnermut naapertuuttuunngitsoq.

Ombudsmandip kommuni qinnuigaa oqaaseqaat sunik isumaliutersuuteqarnissamut pissutissaqalersitsinersoq ilisimateqqulluni, matumani siunissami suliat angerlartitsinermut tunngasut ilanngullugit eqqarsaatigalugit.

Ombudsmandip oqaaseqaataa uani takuuk.

Paasissutissat amerlanerusut uani pissarsiarineqarsinnaapput: Oqarasuaat 32 78 10

TUNULIAQUTAA:

Meeqqat inuusuttullu pillugit peqqussummi (meeqqanik inuusuttunillu ikiorsiisarneq pillugu Inatsisartut peqqussutaanni nr. 1-imi, 15. april 2003-meersumi) § 28 imaattunik oqaasertaqarpoq:

Ҥ 28. Ilaqutariinni inissiinerup taamaatinnissaa aalajangiunneqartinnagu, ilaqutariit paarsisut oqaaseqartinneqassapput. Meeraq kommunerivitami avataani ilaqutariinnut inissinneqarsimappat, meeqqap kommuni uninngavigisaa oqaaseqartinneqassaaq.

Imm. 2. Ulloq unnuarlu paaqqinniffimmiikkunnaarnissamik aalajangiisoqartinnagu ulloq unnuarlu paaqqinniffik oqaaseqartinneqassaaq.

Imm. 3. Ulloq unnuarlu paaqqinniffimmit imaluunniit ilaqutariinnit inuussutissarsiutigalugu paarsisartunit oqaaseqaateqarnermi kommunalbestyrelsip aalajangiunniagaa assortorneqarpat suliaq § 34 malillugu Meeqqat pillugit Paasisimasalittut Qitiusumik Ataatsimiititaliamut oqaaseqarfigisassanngortinneqassaaq.”