Inatsisartut Ombudsmandiat aalajangerpoq Greenland Business A/S suliassaqarfinni ingerlatseqatigiiffiup suliassanik inuussutissarsiornermik siuarsaaneq pillugu inatsit tunngavigalugu isumagisaqarfigisaani Ombudsmandip sulinerani pineqartunut ilaatinneqassasoq.

Tamanna ilaatigut isumaqarpoq innuttaasut suliffeqarfiillu Greenland Business A/S inuussutissarsiornermik siuarsaaneq pillugu inatsit tunngavigalugu tapiissutinik itigartitsisimappat Ombudsmandimut naammagittaaliiorsinnaanngortut. Tamatuma saniatigut soorlu tusagassiortut Greenland Business A/S-ip suliaataani inuussutissarsiornermik siuarsaaneq pillugu inatsit tunngavigalugu tapiissutinut tunngasuni allagaatinik paasitinneqarumanerminnik itigartinneqarunik naammagittaalliorsinnaanngorput.

Greenland Business A/S pisortat ingerlatsiviata ilaginngilaa, taamaattumillu Ombudsmandip sulinerani pineqartunut aallaavittut aamma ilaatinneqarani. Ingerlatseqatigiiffiulli taassuma inuussutissarsiornermik siuarsaaneq pillugu inatsimmi tapiissutinik aqutsineq Kalaallit Nunaanni Namminersorlutik Oqartussat isumaqatigiissuteqarfigalugit isumagisaraa. Taamaattumik ingerlatseqatigiiffik taanna inuussutissarsiornermik siuarsaaneq pillugu inatsimmi malittarisassaq immikkut ittoq tunngavigalugu suliassat suliarineqartarnerat pillugu inatsimmi aamma paasitinneqarsinnaatitaaneq pillugu inatsimmi pineqartunut ilaatinneqarpoq.

Ingerlatseqatigiiffik inatsisikkut imaluunniit aqutsinermi allaffissorluni aalajangiinikkut malittarisassani tunngavinniluunniit pisortat ingerlatsinerannut atuuttuni pineqartunut tamakkiisumik ilaannakortumilluunniit ilanngunneqarpat Ombudsmandi aalajangiisinnaavoq ingerlatseqatigiiffik pineqartoq Ombudsmandip sulinerani pineqartunut tamatuma annertoqataanik ilaatin-neqassasoq.

Ombudsmandip aalajanginnginngermini Greenland Business A/S oqaaseqaateqartippaa.

Paasissutissat amerlanerusut uani pissarsiarineqarsinnaapput:

Ombudsmand Vera Leth. Oqarasuaat 32 78 10

TUNULIAQUTAA

Inuussutissarsiornermik siuarsaaneq pillugu inatsimmi (nunami inuussutissarsiutinut tunngatillugu inuussutissarsiornermik siuarsaaneq pillugu Inatsisartut inatsisaanni nr. 20-mi, 3. december 2012-imeersumi, Inatsisartut inatsisaatigut nr. 4-kkut, 3. juni 2016-imeersukkut allannguuteqartinneqartumi) § 10 imaattunik oqaasertaqarpoq:

“§ 10. §§-it 5 aamma 5 a malillugit tapersiissutit allaffissornikkut aqunneqarnissaat pillugu kommunalbestyrelsimut imaluunniit ingerlatseqatigiiffimmut allaffissornermik suliaqartumut Naalakkersuisut isumaqatigiissuteqarsinnaapput.

Imm. 2. Imm. 1 malillugu suliffeqarfimmik allaffissornermik ingerlataqartumik isumaqatigiissusiortoqarpat, pisortat ingerlatsineranni sulianik suliarinnittarneq pillugu Inatsisartut inatsisaat aamma ingerlatsinermi ammasuunissaq pillugu Inatsisartut inatsisaat suliffeqarfiup allaffissornermik ingerlataqartup Inatsisartut inatsisaat manna malillugu suliaminik isumaginninnera pillugu atuutsinneqassapput.”

Ombudsmandi pillugu inatsimmi (Inatsisartut Ombudsmandiat pillugu Inat-sisartut inatsisaanni nr. 8-mi, 3. december 2009-meersumi) § 7, imm. 3 imaattunik oqaasertaqarpoq:

“Imm. 3. Ingerlatseqatigiiffiit, suliffeqarfiit, peqatigiiffiit il.il. [inatsisikkut imaluunniit] aqutsinermi allaffissorluni aalajangiinikkut pisortat ingerlatsineranni suliassat suliarineqartarnerat pillugu Inatsisartut inatsisaannut, pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaannut imaluunniit inuit pillugit paasissutissanik nalunaarsuineq pillugu inatsiseqartitsinermut ilanngunneqarpata Ombudsmandi aalajangiisinnaavoq suliffeqarfiit pineqartut tamatuma annertoqataanik Ombudsmandip sulinerani pineqartunut ilaatinneqassasut.”