Naalakkersuisoqarfik inatsiseqartitsinermi malittarisassat atuuttut naligiimmillu pinnittarnermik tunngaveqarneq unioqqutinnagit iliuuseqarsimavoq. Taamaattumik Ombudsmandi isumaqarpoq Naalakkersuisoqarfiup suliamik suliarinninneranik isornartorsiuilluni oqaaseqaateqarnissaminut tunngavissaqarani.

Suliap naatsumik allaaserineqarnera

Suliami pineqartoq tassaavoq ingerlatseqatigiiffik namminersortoq Nanortallip eq-qaani erngup nukinga atorlugu nukissiornermut periarfissanik misissueqqaarnermik ingerlatsinermut akuersissummik qinnuteqarsimasoq.

Qinnuteqaat taamani Inuussutissarsiornermut, Suliffeqarnermut, Niuernermut Nu-kissiuuteqarnermullu Naalakkersuisoqarfiup suliarereerlugu itigartippaa, sumiiffiup qinnuteqaatigineqartup Nukissiorfinnut atugassanngortinneqareersimanera inner-suussutigalugu.

Ingerlatseqatigiiffiup namminersortup suliaq naligiimmik pinnittarnermik tunngaviit naapertornagit suliarineqarsimasoq atortussaatippaa, tassami ingerlatseqatigiiffik akuersissummik ingerlatseqatigiiffiup Namminersorlutik Oqartussanit pigineqartup Nukissiorfiit qinnuteqaateqarnerat sioqqullugu qinnuteqaateqarsimammat. Nukissiorfiit Nanortallip eqqaani sumiiffimmi pineqartumi ineriartortitsinissamik soqutigisa-qartuunngitsut Nukissiorfiit siusinnerusukkut oqarsimasut ingerlatseqatigiiffiup namminersortup tamatuma saniatigut atortussaatippaa.

Kalaallit Nunaanni Namminersorlutik Oqartussat erngup nukinganik isumalluutit in-naallagissiornermut atorneqarnissaannik misissueqqaarnernut atuinermullu kisermaassisinnaatitaanerat aamma Naalakkersuisut erngup nukinganik isumalluutit innaallagissiornermut atorneqarnissaannik misissueqqaarnernut atuinermullu akuer-sissuteqarnissaminnut akuersissuteqannginnissaminnulluunniit missingiussilluni naliliinikkut aalajangiinissamut inatsisikkut tunngavissaqarnerat Naalakkersuiso-qarfiup ilaatigut atortussaatippaa. Nukissiorfiit sumiiffik qinnuteqaatigineqartoq soqutiginagu oqarsimanerarneqarnerat Naalakkersuisoqarfiup aammattaaq ilumuunnginnerarpaa.

Naalakkersuisoqarfiup inatsiseqartitsinikkut tunngavigisamik paasinninnera Ombudsmandip suliaq pillugu oqaaseqaammi ilalerpaa, eqikkaallunilu inerniliilluni oqaatigalugu ingerlatseqatigiiffik namminersortoq ingerlatseqatigiiffillu Namminer-sorlutik Oqartussanit pigineqartoq inatsit tunngavigalugu naligiimmik inissisimanngitsut. Ombudsmandip tikkuarlugu aammattaaq oqaatigaa kia misissueqqaarnissamut akuersissummik siulliulluni qinnuteqaateqarsimaneranik suliami illua’tungeriit aaqqiagiinngissutaat suliami tassani aalajangiisuunngitsoq.

Ombudsmandi tamanna tunngavigalugu isumaqarpoq misissuinermik ingerlatseqqinnissamut tunngavissaqanngitsoq, tassami Naalakkersuisoqarfimmik annertunerusutigut isornartorsiuisinnaanini ilimananngimmat.

Ombudsmandip naammagittaalliortumut akissutaa uani atuarsinnaavat

Paasissutissat amerlanerusut oqarasuaammut 32 78 10-mut sianerluni pissarsiarineqarsinnaapput.

Tunuliaqutaa

Erngup nukinga pillugu inatsimmi (erngup nukingata innaallagissiornermut atorne-qartarnera pillugu Inatsisartut inatsisaanni nr. 11. 8. juni 2014-imeersumi) §§-it 3 aamma 4 imaattunik oqaasertaqarput:

“§ 3. Erngup nukinganik isumalluutit innaallagissiornermut atorneqarnissaannut misissueqqaarnernut atuinernullu Namminersorlutik Oqartussat kisermaassisinnaa-titaapput.”

“§ 4. Erngup nukinganik isumalluutit innaallagissiornermut atorneqarnissaannut misissueqqaarnissamut imaluunniit atuinissamut Naalakkersuisut piumasaqaatinik immikkut ittunik aalajangersaasinnaapput.”