Ombudsmandi pisortat paaqqinniffiutaani il.il. assigiinngitsuni, soorlu utoqqarnik, inunnik innarluutilinnik aamma meeqqanik inuusuttunillu paaqqinniffinni, arfinileriarluni 2017-imi misissuivoq.

Paaqqinniffiit najugaqartuutiminnik paarsilluarnersut malittarisassanillu malinninnersut paasiniarneqarnissaat misissuinerit taakkua siunertaraat. Misissuinerni taakkunani paaqqinniffiup initai Ombudsmandip Ombudsmandeqarfimmilu sulisut misissortarpaat, kiisalu pisortaqatigiit, sulisut najugaqartut ilaqutaasullu oqaloqatigisarlugit.

Paaqqinniffiit siumut ilisimatinneqareerajuttarput. Ombudsmandili siumut ilisimatitsissuteqaqqaarani aamma misissuisinnaavoq. Tamanna 2017-imi ataasiarluni pivoq.

Ombudsmandi misissuinerit kingornatigut nalunaarusiortarpoq. Ajornartorsiutit suut Ombudsmandip misissuinermi maluginiarsimanerai paaqqinniffiillu allatut qanoq iliorsinnaanersut Ombudsmandi sunik kaammattuuteqarsimanersoq nalunaarusiami taamaattumi atuarneqarsinnaapput.

2017-imi misissuinerit pillugit nalunaarusiat uani atuarneqarsinnaapput – una toorlugu ammaruk:

• Dronning Ingridip Napparsimmavissuata Tarnikkut Napparsimasunut Immikkoortortaqarfiani A1-imit Nuummiittumi misissuineq

• Meeqqat Angerlarsimaffianni Ivaaqqami Qaqortumiittumi misissuineq

• Inuusuttut Inaanni Qaqortumiittumi misissuineq

• Ippiarsuup immikkoortortaqarfiini Inimi Tikitamilu Nuummiittuni misissuineq

• Ippiarsuup Inuusunnerusunut Innarluutilinnut Immikkoortortaqarfiani Nuummiittumi misissuineq

• Aasianni Utoqqaat Illuanni (siumut ilisimatitsissuteqaqqaarani) misissuineq

Ombudsmandip misissuinerit pillugit nalunaarusiai Ombudsmandip nittartagaatigut www.ombudsmand.gl-ikkut siunissami tamanut saqqummiunneqartalissapput.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.