Pisortani atorfeqartitaasut isornartorsiuillutik oqaaseqaateqarsinnaatitaapput – aamma namminneq sulisitsisortik pillugu. Pisortani sulisitsisup sulisumi isornartorsiutimik tamanut saqqummiutinnginnerini taakku suliffiup iluani saqqummiuteqqaartassagaat aamma piumasaqaatigisinnaanngilaa. Kommunimi sulisup KNR-ip nittartagaani allaaserisaq pillugu oqaaseqaammi kommunip atuarfiinik isornartorsiuilluni oqaaseqaateqarsimaneranik isornartorsiuinerminillu kommunip iluani saqqummiusseqqaarsimannginneranik Kommuneqarfik Sermersuup assuarinnissimanera Ombudsmandip tamanna aallaavigalugu isorisarialerujussuartut pisortanilu atorfeqartitaasut kiffaanngissuseqarlutik oqaaseqaa Pisortani atorfeqartitaasut isornartorsiuillutik oqaaseqaateqarsinnaatitaapput – aamma namminneq sulisitsisortik pillugu. Pisortani sulisitsisup sulisumi isornartorsiutimik tamanut saqqummiutinnginnerini taakku suliffiup iluani saqqummiuteqqaartassagaat aamma piumasaqaatigisinnaanngilaa. Kommunimi sulisup KNR-ip nittartagaani allaaserisaq pillugu oqaaseqaammi kommunip atuarfiinik isornartorsiuilluni oqaaseqaateqarsimaneranik isornartorsiuinerminillu kommunip iluani saqqummiusseqqaarsimannginneranik Kommuneqarfik Sermersuup assuarinnissimanera Ombudsmandip tamanna aallaavigalugu isorisarialerujussuartut pisortanilu atorfeqartitaasut kiffaanngissuseqarlutik oqaaseqaateqarsinnaatitaanerat pillugu malittarisassanik unioqqutitsinertut isigaa.

Suliaq naatsumik oqaatigalugu

Suliami pineqartoq tassaavoq suliamut atatillugu assuarinninneq, Kommuneqarfik Sermersuup kommunimi sulisumut KNR-ip nittartagaani oqaaseqaateqarsimasumut tutsissimasaa. KNR Danmarkimi atuartitsinermut ministerip Nuummi Sisimiunilu atuarfinnut arlalinnut pulaassamaarnera pillugu nittartakkakkut allaaserisaqarpoq. Sulisoq pineqartoq atuarfiit ilaat ministerip pulaassamagaa pillugu isornartorsiuilluni isummersorpoq.

Sulisoq taanna kingusinnerusukkut assuarineqarpoq. Assuarinnissummi ilaatigut makku oqaatigineqarput: “Atuarfitta ilaat pillugu tamanut ammasumik oqaaseqaateqarnerit atuarfiullu pitsaassuseqarnera pillugu oqalliserinninnerit akuerineqarsinnaanngilaq. Suliaq tamanna kommunip nammineq iluani pisariaqarpoq. ...”

Kommuneqarfik Sermersuup assuarinninnermini ilaatigut oqaaseqaatip qanoq nipeqarnera sulisullu kommunimi inissisimanerata sunniuteqarnera isummerfigai.

Ombudsmandi suliaq pillugu oqaaseqaammi ilaatigut inerniliivoq sulisup oqaaseqaataa inatsisinik unioqqutitsisuunngitsoq, kommunilu sulisumik assuarinninnissaminut tunngavissaqanngitsoq.

Ombudsmandip aammattaaq oqaatigaa assuarinninneq malittarisassanik sulisup kommunimi atorfeqartitaasup kiffaanngissuseqarluni oqaaseqaateqarsinnaatitaaneranut ataatsimut atuuttunik kukkusorujussuarmik paasinnissimanermik arlalitsigut takutitsisuusoq.

Ombudsmandip kommuni oqaaseqammi qinnuigaa suliaq suliareqqeqqullugu. Kommunip kingusinnerusukkut nalunaarutigaa assuarinninneq tunuartinneqartoq. Taamaattumik Ombudsdmandi suliami annertunerusumik iliuuseqaqqinnianngilaq.

Ombudsmandip oqaaseqaata uani atuaruk.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

Tunuliaqutaa

Pisortani atorfeqartitaasut kiffaanngissuseqarlutik oqaaseqaateqarsinnaatitaanerat pillugu malittarisassat ilaatigut Justitsministereqarfiup pisortani atorfeqartitaasut kiffaanngissuseqarlutik oqaaseqaateqarsinnaatitaanerat pillugu ilitsersuusiaanni nr. 10062-mi, 28. oktober 2016-imeersumi allaaserineqarput. Ilitsersuut uani atuarsinnaavat (qallunaatut). Ombudsmandip paasinninnera unaavoq ilitsersuut taanna suliassaqarfimmi tassani, aamma Kalaallit Nunaanni, inatsiseqartitsinikkut atuuttut pillugit sukumiisumik allaaserinninnerusoq.

Ilitsersuummit tassannga ilaatigut ersertutut pisortani atorfeqartitaasut kiffaanngissuseqarlutik oqaaseqaateqarsinnaatitaaneranni pingaarnerusutigut tunngaviit arlallit atuupput, makku ilanngullugit eqqarsaatigalugit:

- Oqartussaasoq sinnerlugu kina oqaaseqaateqarsinnaanersoq oqaaseqaateqassagunilu qanoq oqassanersoq pisortani oqartussaasup aalajangersinnaavaa. Kiffaanngissuseqarluni oqaaseqaateqarsinnaatitaaneq pillugu malittarisassat taamaallaat atuuttarput pisortani atorfeqartitaasoq nammineq imminut sinnerluni oqaaseqaateqarpat.

- Taamaalillutik pisortani atorfeqartitaasut nipangiussisussaatitaanerminnik unioqqutitsisussaannginnertik eqqumaffigissavaat.

- Pisortani atorfeqartitaasut oqaaseqaataat eqqissisimanermik ataqqinassusermilluunniit innarliisuussanngillat, taamatuttaarlu pissutissaqanngitsumik sorraatsuussanatik.

- Pisortani atorfeqartitaasut namminneq suliassaqarfimmik iluani pissutsit pingaaruteqartut pillugit paasissutissanik erseqqilluinnartumik eqqunngitsunik saqqummiussissanngillat.

Oqaaseqaatit piumasaqaatinik taakkuninnga eqqortitsigunik inatsisinik aallaavittut unioqqutitsisuussanngillat.

Assersuutigalugu oqaatigineqassaaq pisortani atorfeqartitaasup isornartorsiuinerminik tamanut saqqummiussinnginnermini isornartorsiuinini suliffigisami iluani saqqummiunniaqqaassagaa pisortani oqartussaasumi pisortaqatigiit piumasaqaatigisinaanngikkaat. Sulisut qitiusumik inissisimasut aalajangersimasut eqqarsaatigalugit oqartussasup ilumini aalajangiiniarnerisa oqartussaasullu sulisinnaassuseqarnerata mianerineqarnissaat kiffaanngissuseqarluni oqaaseqaateqarsinnaatitaanerup suli annertunerusumik killissalersorneqarnissaanut tunngavilersuutaasinnaapput, ilitsersuummi sukumiinerusumik allaaserineqartutut.