Angajoqqaap meeqqamik angerlarsimaffiup avataanut inissiinermut akuersinerminik tunuartitsinera kommunit pingasut sivisuallaamik suliaraat. Ombudsmandi oqaaseqaammi nutaami taamatut inerniliivoq.

Meeraq 13-inik ukioqarluni angajoqqaatut oqartussaassusermik tigummiaqartup akuersineratigut angerlarsimaffiup avataanut 2011-mi inissinneqarpoq. Angajoqqaatut oqartussaassusermik tigummiaqartup akuersinini 2012-imi majimi aamma junimi tunuartippaa, meeqqallu angerlartinneqar-nissaa qinnutigalugu.

Angajoqqaatut oqartussaassusermik tigummiaqartoq 2013-imi martsimi kommunimut allamut nuuppoq, suliarlu kommunimut tassunga suliamik tigusisumut nassiunneqarpoq. Kommunili taanna angajoqqaatut oqartus-saassusermik tigummiaqartup kommunimut allamut 2014-imi oktoberimi nooqqinnissaata tungaanut aalajangiinngitsoorpoq. Kommuni nuuffigine-qartoq kingulleq 2016-imi julimi – meeqqap 18-iliinissaa qaammatinik marlunnik sioqqullugu – aalajangiivoq meeraq angerlartinneqarsinnaanngitsoq angerlarsimaffiulli avataani inissisimaannassasoq, angajoqqaatut oqartussaassusermik tigummiaqartoq akuersitinnagu.

Kommunit pingajuata suliami aalajangiinnginnermini Ombudsmandimut oqaatigaa angajoqqaatut oqartussaassusermik tigummiaqartup angerlartit-sinissamik qinnutigisaata kommunimit isummerfigineqarsimannginnera “ajuusaarnartorujussuusoq”.

Inatsisiliornermi piffissaq oqartussaasut sulianik suliarinninnerminnut atortagaat pillugu ataatsimut malittarisassanik aalajangersaasoqarsimanngilaq, sulialli pisortat ingerlatsivianni suliarineqartut sapinngisamik pilertornerpaamik illersorneqarsinnaasumillu suliarineqartarnissaat ingerlatsinermi ileqqorissaarnerup nassataraa.

Ombudsmandip piffissaq kommunini pingasuni taakkunani tamani suliamik suliarinninnermi atorneqartoq tamanna aallaavigalugu isornartorsiorpaa. Angajoqqaatut oqartussaassusermik tigummiaqartup meeqqamik angerlarsimaffiup avataanut inissiinermut akuersinerminik tunuartitsineranit suliami aalajangiisoqarnissaata tungaanut ukiut katillugit sisamat sinnerlugit ingerlasimapput.

Ombudsmandip piffissamik suliap suliarineqarneranut atorneqartumik naliliinermini piffissaq kommunit ataasiakkaarlutik suliamik suliarinninner-minnut atugaat pingaartillugu ilaatigut isiginiarpaa. Angajoqqaatut oqartussaassusermik tigummiaqartoq akuersitinnagu angerlarsimaffiup avataanut inissiinerup annertoorujussuarmik akuliuffiunera Ombudsmandip pingaartillugu aamma isiginiarpaa.

Ombudsmandi tamatuma saniatigut isumaqarpoq kommunip siulliup suliap ingerlasimanera pillugu allakkatigut uppernarsaatinik sukumiisunik peqannginnera isorisariaqartuusoq. Ombudsmandip tamatumunnga atatillugu oqaatigaa kommunip siulliup suliamik uppernarsaasersuinerata amigaate-qarnera kommunit kingulliit marluk suliap ingerlasimaneranik paasisaqarnissaminnut periarfissaannut taamalu aamma piffissamut kommunit taakku suliamik suliarinninnerminnut atugaannut sunniuteqarsimasoq ilimasariaqartoq.

Kommunip siulliup suliamik uppernarsaasersuinerup amigaateqarnera Ombudsmandimut ajuusaarutigaa, suliniutillu arlallit siunissaq isigalugu sulianik suliarinninnermi amigaatinik taamaattumik pinaveersimatitsisussat pillugit nassuiaateqarluni.

Kiisalu Ombudsmandip tikkuarlugu oqaatigaa angajoqqaatut oqartussaassusermik tigummiaqartoq inissiinermik Isumaginninnermi Naammagittaalliuuteqartarfimmut naammagittaalliuutiginninnissaminut piffissaq suliamik suliarinninnermut atorneqartoq sivisooq taanna pissutigalugu ilaatigut mattunneqarsimasoq - taamaattoqarneratigullu angajoqqaatut oqartussaassusermik tigummiaqartup inatsiseqartitsinikkut innarlitsaalineqarnera aalajangiisuusumik sanngiillisinneqarsimasoq.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaammut 32 78 10-mut sianerluni pissarsiarineqarsinnaapput.