Maniitsumi innuttaasut Inatsisartut Ombudsmandiata sulisuinik oqaloqateqarnissaminnut 24. maj 2019-imi periarfissaqassapput. Tassani Ombudsmandip sulinera pillugu annertunerusumik paasissutissiisoqarsinnaavoq Ombudsmandimullu naammagittaalliornissamut periarfissat pillugit ilitsersuisoqarsinnaalluni.

Kikkulluunniit ornigullutik Ombudsmandip sulisuinik oqaloqatiginninnissaminnut tikilluaqqusaapput. Suliaq aalajangersimasoq Ombudsmandip sulisuinut oqaloqatiginnissutiginiaraanni oqartussaasut suliaq pillugu allagarisimasaannik nassataqarneq iluaqutaassaaq.

Ombudsmandip sulisui piffissami uani naapinneqarsinnaapput:

Tallimanngorneq 24. maj 2019 nal. 10-12 oqaluffitoqqami

OMBUDSMANDI SUTIGUT IKIUUSSINNAAVA?

Kalaallit Nunaanni Namminersorlutik Oqartussat kommunillu ataanni pisortat ingerlatsiviat pillugu naammagittaalliuutit Ombudsmandip suliarisinnaavai. Greenland Business A/S aamma INI A/S pillugu naammagittaalliuut Ombudsmandip pisuni aalajangersimasuni suliarisinnaavai. Ombudsmandilli soorlu eqqartuussiviit, politiit pinerluuteqarsimasunilluunniit isumaginnittoqarfik pillugu naammagittaalliuutit suliarisinnaanngilai.

Pisortat aalajangiineri, soorlu pisortanit ikiorsiissutinik, aalisarsinnaanermut akuersissutinik imaluunniit allagaatinik paasitinneqarumanermik itigartitsinerit aamma oqartussaasut pissusilersorneri, soorlu ataqqinninngitsumik nikaginnippalaartumilluunniit oqalunneri, naammagittaalliuutigineqarsinnaapput.

Suliami allamut naammagittaalliornissamut periarfissaqarpat tamanna Ombudsmandimut naammagittaalliunnginnermi atorneqareersimassaaq.

Naammagittaalliuut pisup naammagittaalliuutigineqartup pineranit ukioq ataaseq qaangiutsinnagu Ombudsmandimut tunniunneqassaaq.

Ombudsmandi pillugu inatsit uani atuarneqarsinnaavoq.