Inatsisartut Ombudsmandiat Meeqqat Angerlarsimaffianni Tupaarnami Nuummiittumi 27. aamma 28. februar 2019-imi misissuivoq.

Ombudsmandip Tupaarnaq pitsaasorujussuarnik paasisaqarfigaa, ikittuinnarnillu oqaaseqaatissaqarluni.

Paasisaq unaavoq pisortaqatigiit Tupaarnaq paaqqinniffittut najugaqartunut toqqissisimanartunik angerlarsimaffippalaartunillu avatangiiseqarnissamik, najugaqartunullu pissaanerup sapinngisamik annertunerpaamik atornaveersaarneqarneranik qitiutitsillutik ingerlakkaat. Najugaqartut, sulisut ilaqutaasullu paaqqinniffik nersualaartorujussuuaat. Sulisut misissuiartortunit oqaloqatigineqartut paarsilluartuusut, nalunngeqatiginnissuseqarluartuusut ilumoorfiginnittuusullu malunnarpoq.

Misissuineq pillugu nalunaarusiaq uani atuarsinnaavat.

Paasissutissat amerlanerusut oqarasuaammut 32 78 10-mut sianerluni pissarsiarineqarsinnaapput.

TUNULIAQUTAA

Ombudsmandip misissuisarneri

Innuttaasut pisortat ingerlatsinerat pillugu naammagittaalliuutaannik suliarinninnerup saniatigut paaqqinniffinni innuttaasunut piffissami sivikinnerusumi sivisunerusumiluunniit najugaqarfiusartuni assigiinngitsuni misissuinerit arlallit Ombudsmandip ukiut tamaasa ingerlattarpai.

Paaqqinniffiit najugaqartuutitik ajunngitsumik pineraat malittarisassanillu malinninnersut paasiniassallugu misissuinerit siunertaraat. Misissuinermi Ombudsmandip Ombudsmandeqarfimmilu sulisut paaqqinniffiup initai misissortarpaat tamatumalu saniatigut paaqqinniffimmi pisortaqatigiit, sulisut, najugaqartut ilaqutaasullu oqaloqatigisarlugit.

Paaqqinniffiit siumut kalerrinneqarajuttarput. Ombudsmandili siumut kalerreeqqaarani aamma misissuisinnaavoq.

Ombudsmandi misissuinerit kingornatigut nalunaarusiortarpoq. Tassani ajornartorsiutit suut Ombudsmandip misissuinermi maluginiarsimanerai paaqqinniffiullu allatut iliuuseqarsinnaaneranik sumik kaammattuuteqarsimanera atuarneqarsinnaavoq.