Sulisut najugaqartunik perusuersartarfiliartitsinissaminnut nanginillu taarsiinissaminnut piffissaqaratik misigisarpaat. Ombudsmandeqarfimmit misissuiartortut Utoqqaat Illuanni Luuvikasimmi misissuimmata paaqqinniffimmi pisortaqatigiit sulisullu ilaat arlallit taamatut oqarput.

Sulisoq assersuutigalugu oqaluttuarpoq najugaqartoq siniffimmini qanittukkut quisoorsimasoq, perusuersartarfiliarnissaminut sulisunit piffissaqarfigineqannginnami. Sulisup allap nassuiaatitut oqaatigaa najugaqartut pisuni taamaattuni sulisut ikiuinissaminnut piffissaqarfiginngisaanni natermi aamma quisoorsinnaasartut, naqqullu tamatuma kingornatigut asanneqarnissaa aamma ilaanni piffissaqarfigineqanngitsoortartoq.

Paasissutissat tamakku Ombudsmandip misissuineq pillugu nalunaarusiami nutaami ernumanartutut taavai.

Utoqqaat Illuanni Luuvikasimmi Narsamiittumi misissuineq 24. aamma 25. april 2019-imi ingerlanneqarpoq. Luuvikasik Kommuni Kujallermit ingerlanneqarpoq. Misissuineq pillugu nalunaarusiaq Ombudsmandip nittartagaatigut massakkut tamanut saqqummiunneqarpoq.

Ombudsmandip misissuineq tunngavigalugu pingaarnertut paasisai ukuupput Luuvikasimmi pisortaqatigiit sulisullu najugaqartunut timikkut pissaanermik atuinerup sapinngisamik pinngitsoortinneqarnissaa eqqumaffigisorujussuugaat. Najugaqartut misissuiartortunit oqaloqatigineqartut paaqqinniffimmi najugaqarnertik nuannaralugu oqaatigaat.

Paaqqinniffimmili pissutsit ajornartorsiutaasut arlallit Ombudsmandip nalunaarusiami eqqartorpai.

Najugaqartunik ikiuinissamut piffissaqannginnerup saniatigut ilaatigut eqqaaneqarpoq Luuvikasik piffissani marlunni – 2018-imi aamma 2019-imi januarimi – najugaqartut nangissaannik amigaateqartarsimasoq.

Ombudsmandi nalunaarusiami tamanna tunngavigalugu allappoq utoqqarnik paaqqinniffik Luuvikasittut ittoq najugaqartunut pisariaqarluinnartunik, soorlu nanginik, piffissat ilaanni neqerooruteqarsinnaanngippat tassani ilungersunartumik sumiginnaaneq aamma najugaqartunik ataqqinninngitsumik pinninneq pineqartoq.

Taamaattumik paaqqinniffiup nanginik amigaateqartarsimaneranut pissutaasut Luuvikasiup Kommuni Kujallermi ingerlatsivik peqatigalugu qulaajarniarsarissagai, taamatullu pisoqaqqinnginnissaa qulakkeerniarlugu suliniuteqassasoq Ombudsmandip inassuteqaatigaa.

Misissuineq pillugu nalunaarusiaq uani atuarsinnaavat.

Paasissutissat amerlanerusut oqarasuaammut 32 78 10-mut sianerluni pissarsiarineqarsinnaapput.

TUNULIAQUTAA

Ombudsmandip misissuineri

Innuttaasunit pisortat ingerlatsivii pillugit naammagittaalliuutinik suliarinninnermi saniatigut Ombudsmandi paaqqinniffinnik assigiinngitsunik arlalinnik innuttaasut piffissami sivikinnerusumik sivisunerusumilluunniit najugaqarfittut atugaannik misissuinermik ukiut tamaasa ingerlatsisarpoq.

Misissuinerit taamaattut siunertaat tassaavoq paaqqinniffiit najugaqartunik ajunngitsumik pinninnersut malittarisassanillu malinninnersut paasiniassallugu. Paaqqinniffiup initai Ombudsmandip Ombudsmandeqarfimmilu sulisut misissortarpaat, tamatumalu saniatigut pisortaqatigiit, sulisut, najugaqartut ilaqutaasullu oqaloqatigisarlugit.

Paaqqinniffiit misissuineq sioqqullugu kalerrinneqareerajuttarput. Ombudsmandili siumut kalerreeqqarani aamma misissuisinnaavoq.

Ombudsmandip nalunaarusiaq misissuinerup kingornatigut allattarpaa. Ajornartorsiutit suut Ombudsmandip misissuinermini maluginiarsimanerai Ombudsmandilu paaqqinniffiit allatut qanoq iliuuseqarnissaannik kaammattuuteqarsimanersoq tassani atuarneqarsinnaapput.