Innuttaasup Aningaasaqarnermik Sulisoqarnermillu Aqutsisoqarfiup aalajangiinera pillugu naammagittaalliuutaa Ombudsmandip Aningaasaqarnermut Naalakkersuisoqarfimmut ingerlateqqillugu nassiuppaa, Naalakkersuisoqarfiummi Ombudsmandimut paasissutissiissutigimmagu Aqutsisoqarfiup aalajangiinera Naalakkersuisoqarfimmut naammagittaalliuutigineqarsinnaasoq.

Ombudsmandip allakkat Naalakkersuisut Siulittaasuata Naalakkersuisoqarfianut tamatumunnga peqatigitillugu nassiuppai, Naalakkersuisoqarfillu qinnuigalugu qitiusumik allaffeqarfissuarmi oqartussaassutsimik ilusilersuinerup erseqqissarneqarnissaa pisariaqartinneqarnersoq isumaliutersuutigeqqullugu.

Oqartussaassutsimik ilusilersuineq innuttaasut naammagittaalliornissamut periarfissaannut ilaatigut sunniuteqarpoq, tassami oqartussaasup alliunerusup aalajangiineri oqartussaasumut qulliunerusumut aallaavittut naammagittaalliuutigineqarsinnaammata.

Tassani aamma ilaavoq Ombudsmandip aalajangiinernik oqartussaasumut allamut naammagittaalliuutigineqarsinnaasunik suliarinnissinnaannginnera.

Nalunaarummit 2017-imeersumit erserpoq Naalakkersuisut allaffeqarfimmit immikkoortutut aaqqissugaasumit ikiuuffigineqassasut. Kisianni “oqartussaassutsimik titartaganngorlugu takussutissiamit” Naalakkersuisut kingusinnerusukkut tamanut saqqummiussaannit tamatuma paarlattuanik erserpoq Aqutsisoqarfiit tassaasut “Naalakkersuisoqarfiup Naalakkersuisulluunniit ataanni immikkoortut nammineertut”.

Ombudsmandip oqartussaassutsimik ilusilersuineq erseqqissaqqullugu Naalakkersuisut Siulittaasuata Naalakkersuisoqarfianut siusinnerusukkut siunnersuutigisimavaa. Naammagittaalliuutip pineqartup suliarineqarneranut atatillugu Ombudsmandip suliaq Naalakkersuisoqarfimmut malugeqqullugu oqaatigeqqippaa.

Soraarsitsineq pillugu naammagittaalliuut Ombudsmandip ingerlateqqillugu nassiuppaa

Suliaq Aningaasaqarnermik Sulisoqarnermillu Aqutsisoqarfiup Peqqissutsimik Pinaveersaartitsinermillu Aqutsisoqarfimmi sulisumik soraarsitsisimaneranik aallaaveqarpoq. Soraarsitsineq taanna sulisup Ombudsmandimut tamatuma kingornatigut naammagittaalliuutigaa.

Aningaasaqarnermik Sulisoqarnermillu Aqutsisoqarfiup aalajangiinera Aningaasaqarnermut Naalakkersuisoqarfimmut naammagittaalliuutigineqarsinnaasoq Naalakkersuisoqarfik isumaqarnersoq Ombudsmandip tamanna tunngavigalugu Aningaasaqarnermut Naalakkersuisoqarfimmut apeqqutigaa. Akissut Naalakkersuisut Siulittaasuata Naalakkersuisoqarfia aqqutigalugu nassiuteqqullugu Ombudsmandip Aningaasaqarnermut Naalakkersuisoqarfik qinnuigaa, taamaalilluni Naalakkersuisut Siulittaasuata Naalakkersuisoqarfia suliamik isummerfiginninnissaminut periarfissaqarsinnaaqqullugu.

Aalajangiineq Aningaasarnermut Naalakkersuisoqarfimmut naammagittaalliuutigineqarsinnaasoq Aningaasaqarnermut Naalakkersuisoqarfiup suliaq Naalakkersuisut Siulittaasuata Naalakkersuisoqarfianut oqaloqatiginnissutigereerlugu Ombudsmandi akivaa. Taamaattumik naammagittaalliuut Ombudsmandip Naalakkersuisoqarfimmut ingerlateqqillugu nassiuppaa.

Ombudsmandip oqaaseqaataa uani atuarsinnaavat.

Paasissutissat amerlanerusut uani pissarsiarineqarsinnaapput: Oqarasuaat nr. 32 78 10.

Innersuussutit

Qitiusumik allaffeqarfissuup aaqqissuussaanera pillugu malittarisassat

Naalakkersuisut suleriaasiat pillugu Namminersorlutik Oqartussat nalunaarutaat nr. 18, 9. november 2017-imeersoq qitiusumik allaffeqarfissuup aaqqissuussaanera pillugu aalajangersakkamik imaattumik ilaatigut imaqarpoq:

Ҥ 3. Naalakkersuisut allaffeqarfimmit ingerlatsivimmit immikkoortutut aaqqissugaasumit ikiuuffigineqassapput, Namminersorlutik Oqartussani ataatsimoortutut sulisunit ataasiakkaanik atorfeqartitaasunit. Naalakkersuisup ataani atorfinitsitsinermut oqartussaasup, Naalakkersuisut allaffeqarfiani ingerlatsinerup iluani akisussaasuusup, sulisut atorfinitsitaanerannut atugassarititaasuni suliffiup sumiiffianut il. il. nalunaarutiginissaa pillugu najoqqutassat erseqqarinnerusut aalajangersassavai.

Imm. 2. Atorfinitsitsinermut oqartussaasoq, takuuk imm. 1, Namminersorlutik Oqartussat sulisuinik atorfinitsitsinissamut, allamut nuussinissamut soraarsitsinermullu pisinnaatitaaffeqarpoq.”

Ombudsmandip naammagittaalliuummik suliarinnissinnaanera pillugu malittarisassat

Ombudsmandip naammagittaalliuutinik sunik suliarinnissinnaanera pillugu malittarisassat Inatsisartut Ombudsmandiat pillugu Inatsisartut inatsi-saanni nr. 7-imi, 1. juni 2017-imeersumi aalajangersarneqarput. Taakkunannga ilaatigut makku erserput:

“§ 13. Pissutsit ingerlatsinermi oqartussaasumut allamut naammagittaalliuutigineqarsinnaasut pillugit naammagittaalliuutit aqutsinermi allaffissornikkut oqartussaasumit qullerpaamit aalajangiiffigineqarsimatinnagit suliassanngortinneqarsinnaanngillat.”

Titartaganngorlugu takussutissiaq

Oqartussaassutsimik ilusilersuinerup titartaganngortinneqarnera uani takusinnaavat.