Qaanaami Utoqqaat Illuanni Avannaata Kommunianit ingerlanneqartumi pisortaqatigiit sulisullu pissaanermik atuisarneq pillugu inatsimmi malittarisassat piffissap sivisunerusup ingerlanerani eqqumaffigisimanngilaat. Inatsisartut Ombudsmandiata tamanna najugaqartut inatsiseqartitsinikkut innarlitsaalineqarnerisa aalajangiisuusumik sanngiillisinneqarnerannik nalunaarusiami nutaami taavaa.

Utoqqaat illuanni najugaqaraluaraanniluunniit nammineq aalajangiinissamut pisinnaatitaaffeqarneq aallaavittut atuuppoq. Utoqqaalli illuini sulisut pissaanermik ilaanneeriarlutik atuisariaqartarput, najugaqartut pisariaqarneratut paaqqutarisinnaajumallugit isumassorsinnaajumallugillu. Soorlu najugaqartup puigortunngortup anartarfimmi aqunngasinnaanngitsup nangini taarseqqunngippagu. Pinngitsaaliiniarluni taamatut qaqugukkut tigumminnittarneq pillugu malittarisassat pissaanermik atuisarneq pillugu inatsimmiipput.

Pissaanermik atuisarneq pillugu inatsit najugaqartut inatsiseqartitsinikkut innarlitsaalineqarnissaannut qularnaveeqqutinik arlalinnik aamma imaqarpoq. Ilaatigut pineqartut tassaapput kommunalbestyrelsimut aamma Isumaginninnermi Naammagittaalliuuteqartarfimmut naammagittaalliornissamut periarfissaqarnera kiisalu eqqartuussissuserisumik ikiorteqarsinnaaneq aamma suliani aalajangersimasuni eqqartuussivitsigut misiliisitsinissamut ajornanngitsunnguamik periarfissaqarnera. Tassani aamma ilaapput pisut pissaanermik atuiffiusut pillugit paasissutissanik paaqqinniffiit nalunaarsuisussaanerat paasissutissanillu taakkuninnga kommunimut Naalakkersuisunullu nalunaarutiginnittussaanerat pillugu malittarisassat.

Ombudsmandi Qaanaami Utoqqaat Illuanni 2018-imi aprilimi misissuineq tunngavigalugu pingaarnerusutigut isumaqarpoq pisortaqatigiit sulisullu suliassatik pimoorullugit tunniusimallutillu isumagigaat, najugaqartunullu pissaanermik sapinngisamik atuinaveersaarluinnarneq eqqumaffigigaat. Najugaqartut misissuiartortunit oqaloqatigineqartut tassani najugaqarnertik nuannaralugu oqaati-gaat.

Misissuinermili paasineqarpoq pisortaqatigiit sulisullu pissaanermik atuisarneq pillugu inatsit 2018-imi martsimi aatsaat eqqumaffigilersimagaat. Inatsit taanna 1. december 2013-imili atuutilersimagaluarpoq. Inatsimmik ilisimasaqannginnerup pissaanermik atuinerit kommunimut Naalakkersuisunullu nalunaarutigineqartarsimannginnerat ilaatigut kingunerisimavaa.

Ombudsmandi misissuineq pillugu nalunaarusiami eqikkaalluni inerniliivoq pissaanermik atuisarneq pillugu malittarisassat utoqqaat illuanni najugaqartut eqqarsaatigalugit unioqqutinneqartarsimasut. Pisunili suni taamatut pisoqartarsimanera Ombudsmandip nalunaarutiginnittoqarsimannginnera pissutigalugu erseqqinnerusumik isummerfigisinnaanngilaa.

Ombudsmandip Avannaata Kommuniani kommunalbestyrelsi kommunimi utoqqarnik paaqqinniffinnut pingaarnerusutigut akisussaasuusoq aamma Inatsisartut Inatsisinut Ataatsimiititaliaat nalunaarfigai. Tamanna Ombudsmandi pillugu inatsimmi § 23-mi “annertunerusumik kukkussuteqartoqarsimanissaa imaluunniit sumiginnaasoqarsimanissaa”-mik allassimasoq innersuussutigalugu pivoq. Ombudsmandip tamatuma saniatigut Isumaginninnermut Inatsisinillu Atuutsitsinermut Naalakkersuisoqarfik pissaanermik atuisarneq pillugu inatsit eqqarsaatigalugu suliassaqarfimmi oqartussaasuusoq nalunaarfigaa.

Misissuineq pillugu nalunaarusiaq uani atuarsinnaavat.

Paasissutissat amerlanerusut oqarasuaammut 32 78 10-mut sianerluni pissarsiarineqarsinnaapput.

TUNULIAQUTAA

Pissaanermik atuisarneq pillugu inatsit

Pissaanermik atuisarneq pillugu inatsit (isumaginninnermik suliassaqarfimmi pissaanermik atuineq pillugu Inatsisartut inatsisaat nr. 1, 21. november 2013-i-meersoq kingusinnerusukkut allannguuteqartinneqartoq) soorlu ilaatigut utoqqaat illuini sulisut najugaqartunut aalajangersimasutigut timikkut pinngitsaaliinermik atuinissaannut periarfissiivoq. Inatsit malittarisassanik arlalinnik najugaqartut ataqqinnittumik inatsiseqartitsinikkullu innarlitsaaliinermi illersorneqar-sinnaasumik pineqartarnissaannik qulakkeerinnittunik aamma imaqarpoq. Ass. inatsimmi makku piumasaqaataapput:

• Inuk pisariaqartumik iliuuserineqartussamut nammineq piumassutsi tunngavigalugu peqataatinniarlugu periarfissat tamaasa siulliullugit kommunip atorsimassagai
• Pissaanermik atuineq sapinngisamik qajassuussinerpaamik sivikinnerpaamillu pissasoq
• Nanginik taarsiinermi, uffaanermi assigisaannilu aalajangiilluni tigumminninneq kommunimit aalajangiineq tunngavigalugu pissasoq
• Kommunip aalajangiinera Isumaginninnermi Naammagittaalliuuteqartarfimmut naammagittaalliuutigineqarsinnaasoq
• Pissaanermik atuinerit tamarmik kommunimut Naalakkersuisunullu nalunaarutigineqartassasut

Pissaanermik atuisarneq pillugu inatsit www.inatsisit.gl-imi atuarneqarsinnaavoq.

Ombudsmandip misissuisarneri

Innuttaasut pisortat ingerlatsinerat pillugu naammagittaalliuutaannik suliarinninnerup saniatigut paaqqinniffinni innuttaasunut piffissami sivikinnerusumi sivisunerusumiluunniit najugaqarfiusartuni assigiinngitsuni misissuinerit arlallit Ombudsmandip ukiut tamaasa ingerlattarpai.

Paaqqinniffiit najugaqartuutitik ajunngitsumik pineraat malittarisassanillu malinninnersut paasiniassallugu misissuinerit siunertaraat. Misissuinermi Ombudsmandip Ombudsmandeqarfimmilu sulisut paaqqinniffiup initai misissortarpaat tamatumalu saniatigut paaqqinniffimmi pisortaqatigiit, sulisut, najugaqartut ilaqutaasullu oqaloqatigisarlugit.

Paaqqinniffiit siumut kalerrinneqarajuttarput. Ombudsmandili siumut kalerreeqqaarani aamma misissuisinnaavoq.

Ombudsmandi misissuinerit kingornatigut nalunaarusiortarpoq. Tassani ajornartorsiutit suut Ombudsmandip misissuinermi maluginiarsimanerai paaqqinniffiullu allatut iliuuseqarsinnaaneranik sumik kaammattuuteqarsimanera atuarneqarsinnaavoq.

Ombudsmandi annertunerusutigut kukkussuteqartoqarsimaneranik sumiginnaasoqarsimaneranilluunniit paasisaqaruni Inatsisartut Inatsisinut Ataatsimiititaliaat nalunaarfigissavaa, kommunillu paaqqinniffiutai pineqarpata kommunalbestyrelsi nalunaarfigissallugu. Tamanna Ombudsmandi pillugu inatsimmi (Inatsisartut Ombudsmandiat pillugu Inatsisartut inatsisaanni nr. 7-imi, 1. juni 2017-imeersumi) § 23-kkut aalajangersarneqarpoq.