Avannaata Kommunia meeqqat angerlarsimaffimmik avataanut inissinneqarsimasut angerlartinneqarnissaannik aalajangiinerni pingasuni kukkussuteqarsimavoq. Ombudsmandi oqaaseqaammi nutaami eqikkaalluni taamatut inerniliivoq.

Ombudsmandi kommunip sulianik meeqqat angerlarsimaffimmik avataanut inissinneqarsimasut angerlartinneqarnerinut tunngasunik suliarinnittarneranik siusinnerusukkut oqaaseqaatini 2019-2 tunngavigalugu misissuinermik aallartitsivoq. 2019-2 uani atuarsinnaavat.

Ombudsmandi kommunip sumiiffimmi aalajangersimasumi ingerlatsiviani sulianik angerlartitsisarnermut tunngasunik misissuataarineq tunngavigalugu aalajangerpoq aalajangiinerit pingasut misissorniarlugit.

Angerlartitsisoqarnissaanik aalajangiinerni pingasuni tamani kukkussuteqartoqarsimasoq Ombudsmandi eqikkaalluni inerniliivoq.

Aalajangiinermi siullermi kommuni meeqqamik inissiineq akuersisitsilluni inissiisarneq pillugu malittarisassat tunngavigalugit ingerlaannassasoq akuersisitsinani aalajangiivoq.

Kukkuneq taanna ilungersunartuullunilu isorisariaqartuusoq Ombudsmandi eqikkaalluni inerniliivoq.

Aalajangiinermut tunngavilersuut aammattaaq amigaateqarpoq, tassami tunngavilersuut nassuiaammik naammattumik imaqanngimmat meeqqalluunniit angerlartinneqarumalluni tunngavilersuutaanik naammattumik isummerfiginninngimmat. Tamatuma saniatigut kommunip aalajangiineq angajoqqaatut oqartussaassusermik tigummiaqartumut nalunaarutigisimanngilaa.

Aalajangiinerit aappaanni meeqqap angerlartinneqarnissaanik kommunip aalajangiinerata kingornatigut ukiup ataatsip qaammatillu arfineq marluk missaasa qaangiunneranni aatsaat kommunip aalajangiineq angajoqqaatut oqartussaassusermik tigummiaqartumut nalunaarutigisimavaa.

Ombudsmandi eqikkaalluni inerniliivoq angerlartitsisoqarnissaanik aalajangiineq aalajangiisoqarniariartoq imaluunniit aalajangiinerup kingunitsiannguatigut angajoqqaatut oqartussaassusermik tigummiaqartumut allakkatigut nalunaarutigineqartussaasoq.

Angerlartitsisoqarnissaanik aalajangiinerit pingajuanni kommunip meeqqat ataasiakkaarlugit aalajangiinermik allakkatigut nalunaarfigisimanngilai, taamatuttaarlu kommunip aalajangiinermik angajoqqaanut nalunaarutaa tunngavilersuummik meeqqalluunniit qaqugu angerlartinniarneqarnersut paasissutissamik imaqarani.

Aalajangiinerit marluk Ombudsmandi imatut isumaqarnissaanut pissutissaqalersippaat, tassalu kukkunerit immikkuullarissut pineqanngitsut, kukkunerilli ilaat arlallit pilersimasut suliat sumiiffimmi aalajangersimasumi ingerlatsiviup periaasia suliani angerlartitsinernut tunngasuni atorneqartartoq malillugu suliarineqarsimanerat pissutigalugu.

Taamaattumik sulianik angerlartitsinernut tunngasunik suliarinneriaatsit naammannersut misissoqqullugu Ombudsmandip kommuni kaammattorpaa.

Ombudsmandip oqaaseqaataa uani atuarsinnaavaat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.