Inatsisartut Ombudsmandeqarfiannit misissuiartortut Qeqertarsuarmi Utoqqaat Illuanni misissuineq 2020-mi martsimi ingerlappaat.

Ombudsmandip pingaarnerusutigut paasisai tassaapput najugaqartunut avatangiisit toqqissisimanartut Utoqqaat Illuata neqeroorutigigai. Najugaqartut ilaqutaasullu misissuiartortunit oqaloqatigineqartut Utoqqaat Illuanni pisortaqatigiit paaqqinniffiullu sinaakkutassarititai assut iluarisimaarlugit oqaatigaat.

Misissuiartortut misissuinermut atatillugu paasivaat pisortaqatigiit pissaanermik atuisarneq pillugu inatsimmi malittarisassat atuarsimagaat, oqaatigaluguli inatsit atuareerlugu pissaanermik atuisarneq pillugu inatsimmi malittarisassat Utoqqaat Illuanni suliamik ulluinnarni sulinermut qanoq sunniuteqassanersut erseqqarluttutut isigigitik.

Misissuiartortut tamatuma saniatigut paasitinneqarput pisuni suni kommunalbestyrelsip akuersissutaanik pissarsiniartoqartassanersoq pissaanermillu atuinermi qaqugukkut nalunaarutiginnittoqartassanersoq pisortaqatigiit ilisimanngikkaat.

Misissuiartortut misissuinermi oqaloqatiginninnerit aallaavigalugit paasivaat Utoqqaat Illuanni pisortaqatigiit sulisullu najugaqartunut pissaanermik sapinngisamik atuinaveersaartartut. Ombudsmandilli paasinninnera unaavoq taamatut eqqumaffiginninneq suliassaqarfimmi tassani malittarisassanik naammaginartumik ilisimasaqarnermik tunngaveqanngitsoq.

Ombudsmandi misissuineq pillugu nalunaarusiami eqikkaalluni inerniliivoq pissaanermik atuisarneq pillugu malittarisassat Utoqqaat Illuanni najugaqartut eqqarsaatigalugit arlaatigut unioqqutinneqartarsimasut. Ombudsmandi isumaqarpoq taamaaliornikkut najugaqartut inatsiseqartitsinikkut innarlitsaalineqarnerat aalajangiisuusumik sanngiillisinneqarsimasoq.

Ombudsmandip Kommuni Qeqertalimmi kommunalbestyrelsi kommunip utoqqarnik paaqqinniffiutaanut pingaarnerusutigut akisussaasuusoq aamma Inatsisartut Inatsisinut Ataatsimiititaliaat tamatuminnga nalunaarfigai. Tamanna Ombudsmandi pillugu inatsimmi § 23-mi “annertunerusumik kukkussuteqartoqarsimanissaa imaluunniit sumiginnaasoqarsimanissaa ilimagisariaqartoq”-mik oqarneq innersuussutigalugu pivoq. Ombudsmandip tamatuma saniatigut Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfik pissaanermik atuisarneq pillugu inatsit eqqarsaatigalugu suliassaqarfimmi oqartussaasuusoq tamatuminnga nalunaarfigaa.

Misissuineq pillugu nalunaarusiaq uani atuarsinnaavat.

Paasissutissat amerlanerusut oqarasuaatip normuanut 32 78 10-mi sianerluni pissarsiariniarneqarsinnaapput.

TUNULIAQUTAA

Pissaanermik atuisarneq pillugu inatsit

Pissaanermik atuisarneq pillugu inatsit (isumaginninnermik suliassaqarfimmi pissaanermik atuineq pillugu Inatsisartut inatsisaat nr. 1, 21. november 2013-imeersoq kingusinnerusukkut allannguuteqartinneqarsimasoq) ilaatigut utoqqaat illuini sulisut najugaqartunut aalajangersimasunut nukiit atorlugit pinngitsaaliinermik atuisinnaanerannut periarfissiivoq. Inatsit malittarisassanik najugaqartut nikanarsaataanngitsumik inatsiseqartitsinikkullu innarlitsaaliineq eqqarsaatigalugu illersorneqarsinnaasumik pineqartarnissaannik qulakkeerinneqataasunik arlalinnik imaqarpoq. Soorlu makku inatsimmi piumasaqaatigineqarput:

● Kommuni inuup pisariaqartumik iliuuseqarnermut nammineq piumassutsini malillugu peqataanissaa anguniarlugu periarfissanik tamanik atuereersimassasoq

● Pissaanermik atuineq sapinngisamik qajassuussinerpaamik sapinngisamillu sivikinnerpaamik pisassasoq

● Nangimik taarsiinermi, uffaanermi assigisaannilu aalajangiilluni tigumminninneq kommunip aalajangiinera tunngavigalugu pisassasoq

● Kommunip aalajangiinera Isumaginninnermi Naammagittaalliuuteqartarfimmut naammagittaalliuutigineqarsinnaavoq

● Pissaanermik atuinerit suugaluartulluunniit kommunimut Naalakkersuisunullu nalunaarutigineqartassasut

Pissaanermik atuisarneq pillugu inatsit www.lovgivning.gl-imi atuarneqarsinnaavoq.

Ombudsmandip misissuineri

Ombudsmandi innuttaasut pisortat ingerlatsinerat pillugu naammagittaal-liuutaannik suliarinninnerup saniatigut paaqqinniffinni assigiinngitsuni innuttaasunut piffissami sivikinnerusumi sivisunerusumiluunniit angerlarsimaffiisut atorneqartuni misissuinernik arlalinnik ukiut tamaasa ingerlatsisarpoq.

Misissuinerit siunertaat tassaavoq paaqqinniffiit najugaqartunik ajunngitsumik pinninnersut malittarisassanillu malinninnersut misissussallugu. Init Ombudsmandip Ombudsmandeqarfimmilu sulisut misissuinermi misissuataartarpaat, peqatigitillugulu pisortaqatigiit, sulisut, najugaqartut ilaqutaasullu oqaloqatigisarlugit.

Paaqqinniffiit misissuineq sioqqullugu kalerrinneqareerajuttarput. Ombudsmandili aamma kalerreeqqarani misissuisinnaavoq.

Ombudsmandi misissuinerup kingornatigut nalunaarusiortarpoq. Tassani ajornartorsiutit suut Ombudsmandip misissuinermi maluginiarsimanerai allatullu iliuuserineqarsinnaasut suut kaammattuutigisimanerai atuarneqarsinnaasarpoq.

Ombudsmandip annertunerusumik kukkussuteqartoqarsimasoq sumiginnaa-soqarsimasorluunniit paasiguniuk Inatsisartut Inatsisinut Ataatsimiititaliaat tamatuminnga nalunaarfigissavaa, kommunillu paaqqinniffiutai pineqarpata kommunalbestyrelsi nalunaarfigissallugu. Tamanna Ombudsmandi pillugu inatsimmi (Inatsisartut Ombudsmandiat pillugu Inatsisartut inatsisaanni nr. 7-imi, 1. juni 2017-imeersumi) § 23-kkut aalajangersarneqarpoq.