Ombudsmandeqarfimmit misissuiartortut innarluutilinnik paaqqinniffimmi Najugaqarfik Elisibannguami Maniitsumiittumi misissuineq 2019-imi majimi ingerlappaat.

Elisibannguaq paaqqinniffittut najugaqartut angerlarsimaffippalaartunik toqqissisimanartunillu avatangiiseqarnissaannik pilersitsiniarnermik pisortaqatigiit eqqumaffiginniffigisaattut taamatuttaarlu pisortaqatigiit sulisullu suliassaminnik tunniusimalluarlutik unneqqarillutillu isumaginniffigisaattut Ombudsmandip misissuineq tunngavigalugu pitsaasunik paasisaqarfigaa.

Najugaqartut Elisibannguami najugaqarnertik nuannarerpasippaat, sulisunullu attaveqarluarpasillutik. Sulisut ilaqutaasullu paaqqinniffik nersualaarlugu eqqartorpaat.

Pissutsit oqaaseqaateqarnissamut pissutissaqalersitsisut Ombudsmandip nalunaarusiami eqqartorpai, taamatuttaarlu paaqqinniffiup parnaarsaatinik kisitsisit atorlugit ammarneqartartunik atuineranut tunngasup suliami allami sukumiinerusumik misissuiffigineqarnissaa Ombudsmandip toqqarlugu.

Paaqqinniffiup pisuni pingasuni najugaqartunut pissaanermik atuisimanerminik nalunaarutiginnissimannginnera Ombudsmandip isornartorsiorpaa. Ombudsmandip tamatumunnga peqatigitillugu maluginiarpaa pisortaqatigiit sulisullu pissaanermik atuisarneq pillugu inatsimmik ilinniarteqqinneqarnerat Pinaveersaartitsinermik Isumaginninnermullu Tunngasunik Aqutsisoqarfiup paaqqinniffik suleqatigalugu aallartisarniaraa, matumani nalunaarutiginninnermi immersugassanik immersuisarneq ilanngullugu eqqarsaatigalugu, taamatuttaarlu pissaanermik atuineq pillugu uppernarsaatinik nassiussisarnerup pingaaruteqassusia Elisibannguami sulisunut tamanut erseqqissarneqarsimalluni.

“Najugaqarfik Elisibannguami immikkoortortaqarfiinilu aaliangersakkat malittarisassallu”-mi immikkoortoq paaqqinniffiup “facebooki pillugu politikkia” sulisut Facebookimi paaqqinniffik pillugu allanngilluinnartarnissaannik tamatuminnga unioqqutitsinerup nipangiussisussaatitaanermik unioqqutitsinertut suliarineqassaneranik aalajangersaasoq Ombudsmandip misissuinera tunngavigalugu taamatuttaaq peerneqarpoq.

Misissuineq pillugu nalunaarusiaq uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

TUNULIAQUTAA

Ombudsmandip misissuineri

Ombudsmandi innuttaasunit pisortat ingerlatsinerat pillugu naammagittaalliuutinik suliarinninnermi saniatigut paaqqinniffinni assigiinngitsuni innuttaasut piffissami sivikinnerusumi sivisunerusumiluunniit angerlarsimaffiisut atuuttuni arlalinni misissuinernik ingerlatsisarpoq.

Misissuinerit siunertaat tassaavoq paaqqinniffiit najugagartuutiminnik ajunngitsumik pinninnersut malittarisassanillu malinninnersut paasiniaaneq. Init Ombudsmandip Ombudsmandeqarfimmilu sulisut misissuataartarpaat, kiisalu pisortaqatigiinnik, sulisunik, najugaqartunik ilaqutaasunillu oqaloqateqartarlutik.

Paaqqinniffiit siumut ilisimatinneqareerajuttarput. Ombudsmandili nalunaaqqaarani aamma misissuisinnaavoq.

Ombudsmandip nalunaarusiat misissuinerit kingornatigut suliarisarpai. Ajornartorsiutit suut Ombudsmandip misissuinerni maluginiarsimanerai paaqqinniffiillu allatut qanoq iliornissaannik Ombudsmandip kaammattorsimanerai taakkunani atuarneqarsinnaavoq.