Kommuni innuttaasup inuuniarnermut ikiorsiissutisiaanik aalajangiinerup innuttaasumut nalunaarutigineqarnera ukiunik tallimanik sioqqullugu sunniuteqalersumik aalajangiisinnaanngilaq. Ombudsmandi oqaaseqaammi nutaami eqikkaalluni taamatut inerniliivoq.

Ombudsmandip oqaaseqaammi 2019-imeersumi oqaatigaa innuttaasup inuuniarnermut ikiorsiissutisiaanik Kommuneqarfik Sermersuup 2015-imi januarimi ikililerisimanera inatsiseqartitsinermik atuuttumik unioqqutitsisuusoq, tassami aalajangiineq innuttaasumut toqqartumik nalunaarutigineqarsimanngimmat.

Isumaginninnermi Naammagittaalliuuteqartarfiup suliamik suliarinneqqinnissani 2019-imi decemberimi toqqarpaa, kommunillu aalajangiinera atuussinnaassuseqanngitsutut isigalugu. Taamaattumik suliaq Naammagittaalliuuteqartarfiup nutaamik suliarisassanngortillugu kommunimut utertippaa.

Kommuni suliami nutaamik 22. januar 2020-mi aalajangiivoq, aalajangiinerlu taanna innuttaasumut toqqartumik nalunaarutigineqarpoq. Aalajangiinermi nutaami tassani innuttaasup inuuniarnermut ikiorsiissutisiai 2015-imi januarimit sunniuteqartumik ikililerneqarput.

Kommuni isumaqarpoq Naammagittaalliuuteqartarfiup aalajangiinerata kommuni kingumoortumik atuutilersumik aalajangiinissaanut pisussaaffileraa.

Naammagittaalliuuteqartarfiup aalajangiineranik kommunip paasinninnera Naammagittaalliuuteqartarfiup Ombudsmandilluunniit isumaqatiginngilaat.

Ombudsmandi oqarpoq kommuni innuttaasup inuuniarnermut ikiorsiissutisiaanik kingumoortumik atuutilersumik ikililerippat inatsisiliortut taamaaliornissamut piginnaatitsissutaat ersarissoq qularnaatsorlu piusariaqartoq. Ombudsmandi isumaqarpoq inatsisit kommunimut taamatut piginnaatitsissummik tunniussinngitsut.

Taamaattumik Ombudsmandip isumaqarpoq kommuni innuttaasup inuuniarnermut ikiorsiissutisiaasa ikililerneqarnissaannik aalajangiineq sioqqullugu sunniuteqartumik aalajangiinissaminut pisinnaatitaaffeqaanngitsoq.

Ombudsmandi inerniliilluni eqikkaavoq kommunip aalajangiinera isorisarialerujussuusoq, suliarlu kommunip suliareqqissagaa inassutigalugu.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiariniarneqarsinnaapput.

Oqartussaasoq kingumoortumik atuutilersumik qaqugukkut aalajangiisinnaava?

Aalajangiinerit innuttaasumut nalunaarutigineqaraangamik innuttaasumut sunniuteqarlersarnerat aallaaviuvoq.

Oqartussaasoq aallaavimmik taassuminnga saneqqutsiniaruni kingumoortumillu atuutilersumik aalajangiiniaruni inatsisiliortup tunngavissiissutaanik erseqqissumik qularnaatsumillu peqartariaqarpoq.

Tassa imaappoq oqartussaasoq aalajangiinerup innuttaasumut nalunaarutigineqarnera sioqqullugu sunniuteqartussamik aalajangiiniarpat oqartussaasoq taamaaliorsinnaasoq inatsimmi erseqqissumik qularnaatsumillu allassimassasoq. Taamaattoqanngippat aalajangiineq kingumoortumik atuutilersinnaanngilaq.