Inatsisartut Ombudsmandeqarfiannit misissuiartortut utoqqaat illuanni Sorlaqarfinni Uummannamiittumi misissuineq 2021-mi martsimi ingerlappaat.

Ombudsmandip Sorlaqarfiit pingaarnerusutigut pitsaasunik paasisaaqarfigai. Ombudsmandip paasinninnera unaavoq Sorlaqarfiit sinaakkutassat nuannersut toqqissisimanartullu neqeroorutigigaat, kiisalu najugaqartut kissaatigisaat pisortaqatigiit sulisullu naammassiniarluartartorujussuugaat.

Najugaqartut utoqqaat illuanni najugaqarnertik nuannaralugu sulisunullu attaveqarluarlutik oqaatigaat. Sulisut misissuiartortunit oqaloqatigineqartut Sorlaqarfiit pitsaasumik eqqartorpaat.

Pissutsit arlallit oqaaseqaateqarnissamut pissutissaqalersitsisut Ombudsmandip nalunaarusiamini aamma eqqartorpai.

Sorlaqarfinni sulisut pisortaqatigiillu isumaginninnermut tunngasuni pissaanermik atuisarneq pillugu malittarisassanik atuuttunik eqqumaffiginnissimannginnerat Ombudsmandip ilaatigut isornartorsiorpaa.

Ombudsmandip nalunaarusiami eqikkaalluni inerniliinermini oqaatigaa pissaanermik atuisarneq pillugu malittarisassat utoqqaat illuanni najugaqartut eqqarsaatigalugit ilaatigut unioqqutinneqartarsimasut. Ombudsmandi isumaqarpoq taamaattoqarnerani najugaqartut inatsiseqartitsinikkut innarlitsaalineqarnerat aalajangiisuusumik sanngiillisinneqarsimasoq.

Ombudsmandip Avannaata Kommuniani kommunalbestyrelsi kommunip u-toqqarnik paaqqinniffiutaanut pingaarnerusutigut akisussaasuusoq aamma I-natsisartut Inatsisinut Ataatsimiititaliaat tamatuminnga nalunaarfigai. Tamanna Ombudsmandi pillugu inatsimmi § 23-mi “annertunerusumik kukkus-suteqartoqarsimanissaa imaluunniit sumiginnaasoqarsimanissaa”-nik oqarneq innersuussutigalugu pivoq. Ombudsmandip taakkua saniatigut Isumaginninnermut Suliffeqarnermullu Naalakkersuisoqarfik pissaanermik atuisarneq pillugu inatsit eqqarsaatigalugu suliassaqarfimmi oqartussaasuusoq nalunaarfigaa.

Misissuineq pillugu nalunaarusiaq uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

TUNULIAQUTAA

Pissaanermik atuisarneq pillugu inatsit

Pissaanermik atuisarneq pillugu inatsit (isumaginninnermik suliassaqarfiup iluani pissaanermik atuineq pillugu Inatsisartut inatsisaat nr. 1, 21. november 2013-imeersoq kingusinnerusukkut allannguuteqartinneqartoq) ilaatigut utoqqaat illuani sulisut najugaqartunut aalajangersimasunut nukiit atorlugit pinngitsaaliisinnaanerannut periarfissiivoq. Inatsit malittarisassanik arlalinnik najugaqartut ataqqinnittumik inatsiseqartitsinikkullu innarlitsaaliineq eqqarsaatigalugu illersorneqarsinnaasumik pineqartarnissaannik qulakkeereqataasunik aamma imaqarpoq. Inatsimmi soorlu makku piumasaqaatigineqarput:

● Kommuni pineqartup iliuuseriniakkamut pisariaqartumut nammineq piumassutsi malillugu peqataanissaa anguniarlugu iliuuserineqarsinnaasunik iliuuseqaqqaarsimassasoq.

● Pissaanermik atuineq sapinngisamik qajassuartumik sapinngisamillu sivikinnerpaamik pisassasoq

● Nangimik taarsiinermi, uffaanermi assigisaannilu aalajangiilluni tigumminninneq kommunip aalajangiinera tunngavigalugu pisassasoq

● Kommunip aalajangiinera Isumaginninnermi Naammagittaalliuuteqartarfimmut naammagittaalliuutigineqarsinnaavoq

● Pissaanermik atuineq sunaluunniit kommunimut Naalakkersuisunullu nalunaarutigineqartassasoq

Pissaanermik atuisarneq pillugu inatsit www.inatsisit.gl-imi aamma atuarneqarsinnaavoq.

Ombudsmandip misissuisarneri

Innuttaasut pisortat ingerlatsiviat pillugu naammagittaalliuutaannik suliarinnittarnermi saniatigut paaqqinniffinnik assigiinngitsunik innuttaasunut najugaqarfittut piffissami sivisunerusumi sivikinnerusumiluunniit atorneqartuni misissuinerit arlallit Ombudsmandip ukiut tamaasa ingerlattarpai.

Misissuinerni paaqqinniffiit najugaqartuutiminnik pitsaasumik pinninnersut malittarisassanillu malinninnersut misissorneqarnissaat siunertaavoq. Misissuinerni illut initaat Ombudsmandip Ombudsmandeqarfimmilu sulisut misissuataartarpaat, kiisalu pisortaqatigiinnik, sulisunik, najugaqartunik ilaqutaasunillu oqaloqateqartarlutik.

Paaqqinniffiit siumut kalerrinneqareertarput. Ombudsmandili siumut kalerreeqqaarani aamma misissuiartorsinnaavoq.

Ombudsmandip nalunaarusiaq misissuinerit kingornatigut suliarisarpaa. Ajornartorsiutit suut Ombudsmandip maluginiarsimanerai Ombudsmandilu suut allatut suliarineqarsinnaanerannik paaqqinniffinnut sunik kaammattuuteqarsimanersoq tassani atuarneqarsinnaapput.

Ombudsmandi kukkunernik sumiginnaanernillunniit annertunerusunik paasisaqaruni Inatsisartut Inatsisinut Ataatsimiiititaliaannut nalunaaruteqartussaavoq, kommunillu paaqqinniffiutaa pineqarpat kommunalbestyrelsinut nalunaaruteqartussaalluni. Tamanna Ombudsmandi pillugu inatsimmi (Inatsisartut Ombudsmandiat pillugu Inatsisartut inatsisaanni nr. 7-imi, 1. juni 2017-imeersumi) § 23-kkut aalajangersarneqarpoq.