Kommunit sulianik meeqqat angerlarsimaffimmik avataannut innissinneqartarnerinut meeqqallu inissinneqarsimasut angerlartinneqartarinut tunngasunik suliarinnittarnerat Ombudsmandip arlaleriarluni misissuiffigisarsimavaa. Misissuinerit taakkua Ombudsmandi kommunit sulianik suliarinninnerinik isornartorsiuinissaanut pissutissaqalersikkajuttarsimavaat.

Ombudsmandip paasinninnera unaavoq kommunit sulianik meeqqat inissinneqarnerinut angerlartinneqarnerinullu tunngasunik suliarinninnerminni suli ilungersunartunik kukkussuteqartartut.

Taamaattumik meeqqat illersuisuat Aviâja Egede Lynge sulisunilu 9. april 2021-mi ataatsimiigiaqqullugit Ombudsmandimut qaaqquneqarsimapput. Meeqqat illersuisuata ajornartorsiutit suut kommunit pingaartumik sulianik meeqqat inissinneqartarnerinut angerlartinneqartarnerinullu tunngasunik suliarinninnerini takusarnerlugit ataatsimiinnermi tassani oqaluttuaraa.

Ombudsmandi tamanna tunngavigalugu aalajangerpoq suliniummik suliniut sulianik meeqqat inissinneqartarnerinut angerlartinneqartarnerinullu tunngasunik qitiutitsisumik nammineerluni annertunerusumik misissuiffiginninnertut aallarnisaaniarluni.

Ombudsmandi kommunimut arlalinnut 2021-mi ukiakkut angalaniarpoq. Tassani Ombudsmandip suliat meeqqanik inissiinernut angerlartitsinernullu tunngasut arlallit misissussavai, kommunillu sulianik suliarinninneri sukumiinerusumik misissuataassallugit.

Kommunit sulianik meeqqat inissinneqartarnerinut angerlartinneqartarinerinullu tunngasunik suliarinnittarnerat pillugu nalunaarusiaq Ombudsmandip tamatuma kingornatigut tamanut saqqummiutissavaa. Tamanna 2022-mi upernaakkut pissagunarpoq.

Paasissutissat amerlanerusut uani pissarsiarineqarsinnaapput: Oqarsuaatip normua 32 78 10.

Tunuliaqutaa

Ombudsmandi oqartussaasup sulianik suliarinninneranik nammineerluni a-taatsimut misissuiffiginnilersinnaavoq. Tamanna Inatsisartut Ombudsman-diat pillugu Inatsisartut inatsisaanni nr. 7-imi, 1. juni 2017-imeersumi § 15, imm. 2-kkut aalajangersarneqarpoq.