Inatsisartut Ombudsmandeqarfiannit misissuiartortut paaqqutarinniffimmi Unganartumi Illulissaniittumi misissuineq 2022-mi martsimi ingerlappaat. Misissuineq Ombudsmandip ataatsimut sulinerata ilaatut ingerlanneqarpoq, taamaalillunilu paaqqutarinniffik pillugu naammagittaalliuummik tunngaveqarani.

Ombudsmandip pingaarnerusutigut paasisai tassaapput ataatsimut immikkoortortaqarfiit angerlarsimaffippalaartut najugaqartut toqqissisimanartitaat Unganartup neqeroorutigigai. Ombudsmandip paasisaa aammattaaq unaavoq paaqqutarinniffimmi pisortaqatigiit sulisullu suliassatik tunniussimallutik unneqqarillutillu isumagigaat.

Ombudsmandilli pissutsit oqaaseqaateqarnissamut pissutissaqalersitsisut misissuineq pillugu nalunaarusiami aamma eqqartorpai.

Unganartup najugaqartunut piffissami sivisunerusumi pissaanermik atuisarsimanera pissaanermillu atuinerit taakkua pissusissaatut nalunaarsorneqartarsimannginnerat nalunaarutigineqartarsimannginnerallu Ombudsmandip nalunaarusiami isornartorsiorpaa.

Ombudsmandi isumaqarpoq taamaaliornikkut najugaqartut inatsiseqartitsinikkut innarlitsaalineqarnerat sanngiillisinneqarsimasoq. Tamanna Ombudsmandip isorisarialittut taavaa.

Ombudsmandip Avannaata Kommuniani kommunalbestyrelsi kommunip utoqqarnik paaqqinniffiutaanut pingaarnerusutigut akisussaasuusoq aamma Inatsisartut Inatsisinut Ataatsimiititaliaat tamatuminnga nalunaarfigai. Tamanna Ombudsmandi pillugu inatsimmi § 23-mi “annertunerusumik kukkussuteqartoqar-simanissaa imaluunniit sumiginnaasoqarsimanissaa ilimagisariaqartoq”-mik oqarneq innersuussutigalugu pivoq. Ombudsmandip tamatuma saniatigut Meeqqanut Ilaqutariinnu Naalakkersuisoqarfik pissaanermik atuisarneq pillugu inatsit eqqarsaatigalugu suliassaqarfimmi oqartussaasuusoq tamatuminnga nalunaarfigaa.

Ombudsmandip tamatumunnga peqatigitillugu maluginarpaa kommunip pissaanermik atuisarneq pillugu peqqusissut kommunimi paaqqinniffinnut susassaqartunut tamanut 2021-mi ukiakkut suliarisimagaa. Peqqisusissut taanna Unganartup tigusimanngilaa. Kommunip tamanna tunngavigalugu paaqqinniffiit sinneri peqqusissummik nassiussigivisimasorisani taamaattumik taamatuttaaq tigusaqarsimannginnersut paasiniarniarpaa.

Misissuineq pillugu nalunaarusiaq uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiariniarneqarsinnaapput.

TUNULIAQUTAA

Pissaanermik atuisarneq pillugu inatsit

Pissaanermik atuisarneq pillugu inatsit (isumaginninnermik suliassaqarfimmi pis-saanermik atuineq pillugu Inatsisartut inatsisaat nr. 1, 21. november 2013-i-meersoq kingusinnerusukkut allannguuteqartinneqarsimasoq) ilaatigut utoqqaat illuini sulisut najugaqartunut aalajangersimasunut nukiit atorlugit pinngitsaaliinermik atuisinnaanerannut periarfissiivoq. Inatsit malittarisassanik najugaqartut nikanarsaataanngitsumik inatsiseqartitsinikkullu innarlitsaaliineq eqqarsaatigalugu illersorneqarsinnaasumik pineqartarnissaannik qulakkeerinneqataasunik arlalinnik imaqarpoq. Soorlu makku inatsimmi piumasaqaatigineqarput:

● Kommuni inuup pisariaqartumik iliuuseqarnermut nammineq piumassutsini malillugu peqataanissaa anguniarlugu periarfissanik tamanik atuereersimassasoq

● Pissaanermik atuineq sapinngisamik qajassuussinerpaamik sapinngisamillu sivikinnerpaamik pisassasoq

● Nangimik taarsiinermi, uffaanermi assigisaannilu aalajangiilluni tigumminninneq kommunip aalajangiinera tunngavigalugu pisassasoq

● Kommunip aalajangiinera Isumaginninnermi Naammagittaalliuuteqartarfimmut naammagittaalliuutigineqarsinnaasoq

● Pissaanermik atuinerit suugaluartulluunniit kommunimut Naalakkersuisunullu nalunaarutigineqartassasut

Pissaanermik atuisarneq pillugu inatsit www.lovgivning.gl-imi atuarneqarsinnaavoq.

Ombudsmandip misissuineri

Ombudsmandi innuttaasut pisortat ingerlatsinerat pillugu naammagittaalliuu-taannik suliarinninnerup saniatigut paaqqinniffinni assigiinngitsuni innuttaasunut piffissami sivikinnerusumi sivisunerusumiluunniit angerlarsimaffiisut atorneqartuni misissuinernik arlalinnik ukiut tamaasa ingerlatsisarpoq.

Misissuinerit siunertaat tassaavoq paaqqinniffiit najugaqartunik ajunngitsumik pinninnersut malittarisassanillu malinninnersut misissussallugu. Init Ombudsmandip Ombudsmandeqarfimmilu sulisut misissuinermi misissuataartarpaat, tamatumunngalu peqatigitillugu pisortaqatigiit, sulisut, najugaqartut ilaqutaasullu oqaloqatigisarlugit.

Paaqqinniffiit misissuineq sioqqullugu kalerrinneqareerajuttarput. Ombudsmandili aamma kalerreeqqaarani misissuisinnaavoq.

Ombudsmandip nalunaarusiaq misissuinerup kingornatigut suliarisarpaa. Tassani ajornartorsiutit suut Ombudsmandip misissuinermi maluginiarsimanerai allatullu iliuuserineqarsinnaasut suut kaammattuutigisimanerai atuarneqarsinnaasarpoq.