Kommunit sulianik meeqqanik inissiisarnernut angerlartitsisarnernullu tunngasunik suliarinnittarnerat qitiutillugu misissuinermik aallartitsiniarluni aalajangernini Ombudsmandip 2021-mi junimi nalunaarutigaa.

Misissuineq taanna Ombudsmandip kommunit sulianik meeqqanik angerlarsimaffiup avataanut inissiisarnernut aamma meeqqanik inissinneqarsimasunik angerlartitsisarnernut tunngasunik arlaleriarluni misissuisarsimaneranik misissuinerillu taakku kommunit sulianik suliarinninnerinik Ombudsmandip isornartorsiuinissaanut pissutissaqalersitsigajuttarsimanerat tunngavigalugu aallartinneqarpoq.

Ombudsmandi 2022-mi ukiumoortumik nalunaarummini allappoq Inatsisartuni, Naalakkersuisuni kommunalbestyrelsinilu politikkikkut aalajangiisartut killiffimmik isumaliutersuuteqarnermut suliniutinullu nutaanut tunngaviusinnaasumik misissuinikkut tunisinnaassallugit neriuutigigini.

Ombudsmandip misissuinermini atugassatut Kommuni Kujalleq aamma Qeqqata Kommunia kommunitut misissuinermi aallaavigineqartussatut tigulaarinikkut toqqarpai.

Ombudsmandip sulisuisa pingasut suliat 30-t 2020-meersut 2021-meersullu kommunit meeqqanik angerlarsimaffiup avataanut inissiinerinut aamma meeqqanik angerlartitsinerinut tunngasut tigulaarinikkut toqqarneqartut misissorpaat.

Ombudsmandi misissuinini massakkut naammassivaa, ataatsimoortumillu nalunaarusiaq suliaralugu.

Ombudsmandip makku nalunaarusiami erseqqissarpai:

Ombudsmandip kommunit sulianik meeqqanut tunngasunik ilungersunartunik pingaaruteqartunillu suliarinninnerminni ajornartorsiuteqarajuttarnerannik paasinninnera misissuinerup taassuma uppernarsarpaa. Ombudsmandip paasisaa aamma unaavoq kommunit suli ilungersunartunik kukkussuteqartartut, kommunimmi paasissutissanik pissarsiniarnerminni misissuinernilluunniit meeqqap angerlarsimaffimmi avataanut inissinneqarneranut imaluunnit meeqqap inissinneqarsimasup angerlartinneqarneranut atatillugu piumasaqaataasunik ingerlatsiniarnerminni ajornatorsiuteqarajuttartut.

Misissuinerup ilaatigut takutippaa sulianit inissiinernut tunngasunit 15-init misissorneqartunit suliani arfineq marlunni allakkatigut aalajangiinerit amigaataasut. Ombudsmandip tamanna pillugu oqaatigaa misissuineq tunngavigalugu nammineq paasinninnini unaasoq kommunit aalajangiinerminnik suliami illua’tungiusumut allakkatigut nalunaarutinik suliarinnittannginnerat annertoorujussuusoq. Ombudsmandip paasinninnera unaavoq tamanna ernumanartuusoq, tassami inissiineq angerlartitsinerluunniit pillugu nalunaarut meeqqamut inissinneqartumut angajoqqaatullu oqartussaassusermik tigummiaqartumut ima pingaaruteqartigisoq allakkatigut nalunaarutigisariaqarluni.

Misissuinerup aammattaaq takutippaa tamanna meeqqanik tapersersuisarneq pillugu inatsimmi piumasaqaatagaaluartoq sulianit angerlartitsinernut tunngasunit 15-iusunit misissorneqartunit suliani arfineq pingasuni inissiiviusup oqaaseqaataa pissarsiariniarneqartarsimanngitsoq. Ombudsmandi tamanna pillugu eqikkaalluni inerniliinermini oqarpoq kommunit meeqqanik angerlarsimaffimmik avataanut inissinneqarsimasunik angerlartitsinermut atatillugu inissiiviusup oqaaseqaataanik pissarsinianngippallaartartut. Ombudsmandip paasinninnera unaavoq tamanna ajornartorsiutaasoq, tassami inissiiviusup oqaaseqaataa meeqqat pisinnaatitaaffiinik meeqqap nalinginnaasumik atugarissaarnera aallaavigalugu qulakkeereqataasarmat.

Kiisalu misissuinerup takutippaa naak tamanna meeqqanik tapersersuisarneq pillugu inatsit tunngavigalugu piumasaqaataagaluartoq sulianit qulingiluanit inissiinernut tunngasunit misissorneqartunit suliani pingasuni meeqqat oqaloqatigineqarsimanngitsut, sulianillu 15-init angerlartitsinermut tunngasunit misissorneqartunit suliani arfineq marlunni meeqqat oqaloqatigineqarsimanatik. Taamaattumik Ombudsmandi eqikkaallluni inerniliivoq kommunit meeqqanik oqaloqatiginnittanngippallaarsimasut, tamannalu sulianut inissiinernut aamma angerlartitsinernut tunngasunut atuuttoq. Meeqqap isummaminik akornutissaqarpallaarani saqqummiussisinnaatitaanera meeqqamik oqaloqateqarnerup qulakkeertussaavaa. Taamaattumik oqartussaasumi eqqartuussinermik suliaqartumi ingerlatsivimmiluunniit oqartussaasumi meeqqamik pineqartumik suliarinnittumi suliarinninnerni suugaluartuniluunniit meeqqap oqaaseqaateqarnissaminut periarfissinneqartarnissaa immikkut pingaaruteqarpoq.

Ombudsmandip kommunini marlunni taakkunani sulianik meeqqat inissineqartarnerinut angerlartinneqartarnerinullu tunngasunik misissuineq inaarutaasumik nalunaarusiakkut naammassillugu suliarineqartutut isigaa.

Ombudsmandip nalunaarusiaa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

Tunuliaqutaa

Ombudsmandi oqartussaasup sulianik suliarinninneranik nammineerluni misis-suiffiginnilersinnaavoq. Tamanna Inatsisartut Ombudsmandiat pillugu Inatsisartut inatsisaanni nr. 7-imi, 1. juni 2017-imeersumi § 15, imm. 2-kkut aalajangersarneqarpoq.