Paamiuni innuttaasut Inatsisartut Ombudsmandiata sulisuinik oqaloqateqarnissaminnut 10. maj 2023-mi periarfissaqassapput. Tassani Ombudsmandip sulinera pillugu annertunerusumik paasisaqartoqarsinnaavoq Ombudsmandimullu naammagittaalliornissamut periarfissat pillugit ilitsersortittoqarsinnaalluni.

Kikkulluunniit ornigullutik Ombudsmandip sulisuinik oqaloqatiginninnissaminnut tikilluaqqusaapput. Suliaq aalajangersimasoq Ombudsmandip sulisuinut oqaloqatiginnissutiginiarukku qinnuigineqarputit oqartussaasut suliaq pillugu allagarisimasaannik nassataqaqqullutit. Inuk alla sinnerlugu naammagittaallioruit taassuma piginnaatitsissutaanik pissarsiniarnissat eqqaamassavat.

Ombudsmandip sulisui piffissami uani naapinneqarsinnaapput:

Pingasunngornermi 10. maj 2022 nal. 14-18 katersortarfimmi

OMBUDSMANDI SUTIGUT IKIUUSSINNAAVA?

Kalaallit Nunaanni Namminersorlutik Oqartussat kommunillu ataanni pisortat ingerlatsiviat pillugu naammagittaalliuutit Ombudsmandip suliarisinnaavai. Greenland Business A/S aamma INI A/S pillugu naammagittaalliuutit Ombudsmandip pisuni aalajangersimasuni suliarisinnaavai. Ombudsmandilli soorlu eqqartuussiviit, politiit pinerluuteqarsimasunilluunniit isumaginnittoqarfik pillugu naammagittaalliuutit suliarisinnaanngilai.

Pisortat aalajangiineri, soorlu pisortanit ikiorsiissutinik, aalisarsinnaanermut akuersissutinik imaluunniit allagaatinik paasitinneqarumanermik itigartitsinerit aamma oqartussaasut pissusilersorneri, soorlu ataqqinninngitsumik nikaginnippalaartumilluunniit oqalunneri, naammagittaalliuutigineqarsinnaapput. Oqartussaasoq suliamik suliarinninnerminik sivitsuloorussivallaarpat innuttaasulluunniit saaffiginnissutaanut akissuteqarneq ajorpat Ombudsmandi aamma naammagittaalliorfigineqarsinnaavoq.

Suliami allamut naammagittaalliornissamut periarfissaqarpat taanna Ombudsmandimut naammagittaalliunnginninni atoqqaassavat.

Naammagittaalliuut pisup naammagittaalliuutigineqartup pineranit ukioq ataaseq qaangiutsinnagu Ombudsmandimut tunniunneqassaaq.