Puilasumik Qasigiannguaniittumik misissuineq

Misissuiartortut Inatsisartut Ombudsmandeqarfianeersut kommunip suliffeqarfiutaani Puilasumi Qasigiannguaniittumi april 2022-mi misissuipput.

Ombudsmandip Puilasoq ajunngilluinnartumik misigisaqarfigivaa. Ataatsimut isigalugu ombudsmandi isumaqarpoq Puilasoq najugaqartunut toqqissisimanartumik avatangiiseqartitsilluni neqerooruteqartoq. Najugaqartut misissuiartortunit oqaloqatigineqartut Puilasumi najugaqarnertik nuannaralugu oqaatigivaat. Misissuiartortut maluginiarpaat najugaqartut sulisullu akornanni eqqissillutik angerlarsimaffippalaartumik imminnut pissuseqarnerat.

Ombudsmandi ataasiakkaanik Puilasumut oqaaseqarusuppoq, tassunga ilaalluni pissaanermik atuineq pillugu inatsit suliffeqarfiup sulisuinut tunniunneqassasoq aamma qitornat angajoqqaallu pissaanermik atuineq pillugu malittarisassanik ilisimatinneqassasut. Tamatuma saniatigut ombudsmandimit oqaatigineqarpoq angerlarsimaffimmi malittarisassat, tassunga ilaatinneqarluni oqarasuaatit angallattakkat aamma tabletsit atorneqartarnerinut malittarisassat.

Puilasoq aamma Kommune Qeqertalik misissuinermi nalunaarusiaagallattoq pillugu oqaaseqaateqarput. Tamannalu tunngavigalugu Puilasumi misissuineq ombudsmandimit naammassineqarpoq.

Misissuinermi nalunaarusiaq uani atuarsinnaavat.

Annertunerusumik paasisaqarusukkuit: Oqarasuaat 32 78 10

Ombudsmandip misissuiartortarneri
Pisortat ingerlatsiviini naammagittaalliuutinik suliaqartarnerup saniatigut ombudsmandi ukiut tamaasa suliffeqarfinni assigiinngitsuni arlalinnik misissuisarpoq, angerlarsimaffinnik innuttaasunik sivikinnerusumi sivisunerusumiluunniit najugaqartitsisunik.

Misissuiartortarnerni siunertaavoq suliffeqarfiit najugaqartunik paaqqinnilluarnerat aamma malittarisassat malinneqarnersut misissussallugit. Ombudsmandip pulaarnermini suliffeqarfiup sulisui peqatigalugit init takusarpaat aammalu pisortaqatigiit, sulisut, najugaqartut ilaqutaasullu oqaloqatigisarlugit.

Suliffeqarfiit nalinginnaasuumik siumut kalerrinneqareertarput. Aammali ombudsmandi nalunaaqqaarani pulaarsinnaasarluni.

Pulaartoqareerneratigut ombudsmandi nalunaarusiortarpoq. Tassani atuarneqarsinnaasarput ombudsmandip pulaarnermini ajornartorsiutaasinnaasut suut eqqumaffigisimanerai, aammalu qanoq suliffeqarfik allaanerusumik iliorsinnaaneranik ombudsmandi innersuussuteqartarluni.

Ombudsmandimit kukkunerit imaluunniit sumiginnaanerit annertunerusumik pingaarutillit paasineqarpata, ombudsmandi Inatsisartunut Inatsisilerinermi Ataatsimiititaliaanut nalunaaruteqartussaavoq, kommunimilu suliffeqarfiit pineqarpata kommunalbestyrelsimut. Tassani malinneqarpoq ombudsman-deqarneq pillugu inatsimmi § 23 (Inatsisartut inatsisaat nr. 7, 1. juni 2017-imeersoq Inatsisartut Ombudsmandiat pillugu).