Inatsisartut ombudsmandiannit misissuiartortut september 2022-mi tarnimikkut nappaatilinnut immikkoortortaqarfimmi A1-imi Dronning Indridip Napparsimmavissuani Nuummiittumi OPCAT tunngavigalugu misissuineq ingerlappaat. Misissuineq taanna ombudsmandeqarfiup ataatsimut sulineranut ilaatillugu ingerlanneqarpoq, taamaalillunilu naammagittaalliuummik aalajangersimasumik tunngaveqarani misissuinerulluni.

Ombudsmandip pingaarnertut paasisaa unaavoq, sulisut, sinaakkutassiissutigineqartut iluanni, uninngasunut ataatsimut isiginnilluni katsorsaanermik ingerlatsiniartut, pisullu ilaanni arlalinni immikkoortortaqarfiup pisussaaffigiligaanera ilinniarsimasallu sinnerlugit iliuuseqartartut. Ombudsmandi isumaqarpoq A1-imi sulisut taamatut periaaseqarnertik suliniuteqarnertillu pillugit assut nersualaarneqartariaqartut.

Nalunaarsuiffimmi ombudsmandip taamaattorli pulaarnerminit pissutsit aamma  oqaaseqaateqarnissaanut pissutissaqalersitsisut eqqartorpai.

Nalunaarusiami ombudsmandi ilaatigut napparsimasut, A1-ip ikiugassai pillugit, ernumanini oqaatigaa, pissutigalugu ombudsmandip paasigamiuk arlallit unamminartuusut, sulisussarsiniarnikkut, sulisunik attassiinnarniarnikkut il.il. naapertorlugit piffissami sivisunerusumi immikkoortortaqarfik tamaviaavissumik sulisinniarneqarsimalluni.

Ombudsmandip aammattaaq nalunaarusiami immikkoortut arlallit eqqartorpai, initatigut avatangiisit, sulisut, pinngitsaaliissutinik atorneqartunik allattuisarneq il.il. pillugit.

Tarnikkut nappaatilinnut immikkoortortaqarfik A1 kiisalu Peqqissutsimut Naalakkersuisoqarfik nalunaarusiaq saqqummiunneqannginnerani nalunaarusiamut missingiut pillugu oqaaseqaammik saqqummiussinissaminnut periarfissinneqarnikuupput.

Misissuinermi nalunaarusiaq uani atuarsinnaavat.

Paasissutissanik allanik paasisaqarusukkuit: Oqarasuaat 32 78 10

TUNULIAQUTAA
Ombudsmandip misissuineri

Innuttaasut pisortat ingerlatsinerat pillugu naammagittaalliuutaat suliarisarnerisa saniatigut ombudsmandi paaqqinniffinnik assigiinngitsunik innuttaasut piffissami sivikinnerusumi sivisunerusumilluunniit najugaqarfigisartagaanni arlalinnik ukiut tamaasa misissuisarpoq.

Misissuinerit siunertaat tassaavoq paaqqinniffiit ajunngitsumik pinninnersut malittarisassanillu malinninnersut paasiniassallugu. Misissuinermi paaqqinniffiup initai ombudsmandip ombudsmandeqarfimmilu sulisut alakkartertarpaat, tamatumalu saniatigut pisortaqatigiit, sulisut, najugaqartut ilaqutaasullu oqaloqatigisarlugit.

Paaqqinniffiit misissuineq sioqqullugu kalerrinneqareerajuttarput. Ombudsmandili siumut kalerreeqqaarani aamma misissuisinnaavoq.

Ombudsmandi pillugu inatsimmi aalajangersarneqarpoq Ombudsmandip naalliutsitsisarneq allatullu peqqarniingaartumik, inuppalaanngitsumik imaluunniit nikanarsaataasumik pinnittarneq imaluunniit pillaasarneq akiorniarlugit Naalagaaffiit Peqatigiit isumaqatigiissutaannut ilassut 18. december 2002-meersoq nammineq piumassuseq tunngavigalugu ilannguffigineqarsinnaasoq tunngavigalugu nuna tamakkerlugu pinaveersaartitsisutut suliassaq isumaqatigiissummut ilassummi aalajangersakkat tunngavigalugit isumagissagaa.

Isumaqatigiissummut ilassut taanna tuluttut “The Optional Protocol to the Con-vention Against Torture and other Cruel, Inhuman or Degrading Treatment or Punishment”-imik (naalliutitsisarneq allatullu peqqarniingaartumik, inuppalaanngitsumik imaluunniit nikanarsaataasumik pinnittarneq imaluunniit pillaasarneq akiorniarlugit isumaqatigiissummut ilassummik nammineq piumassuseq tunngavigalugu ilannguffigineqarsinnaasumik) taaguuteqarpoq, naalisarlugu OPCAT-imik taaneqartartoq. Isumaqatigiissummut ilassut OPCAT taanna Udenrigsministereqarfiup nalunaarutaatigut nr. 38-k-kut, 27. oktober 2009-meersukkut tamanut saqqummiunneqarpoq.

Isumaqatigiissummut ilassutip OPCAT-ip siunertaa tassaavoq sumiiffinni inuit kiffaanngissusiiagaaffigisaanni nunat tamat suliniaqatigiiffiini nunamilu namminermi oqartussaasut arlaannaannulluunniit attuumassuteqanngitsut akuttunngitsumik misissuiartortarnerinik pilersitsisoqarnissaa, naalliutsitsisarneq allatullu peqqarniingaartumik, inuppalaanngitsumik imaluunniit nikanarsaataasumik pinnittarneq pillaasarnerluunniit pinaveersaartinniarlugu.

Ombudsmndi misissuinerit kingornatigut nalunaarusiortarpoq. Ajornartorsiutit suut ombudsmandip misissuinermi maluginiarsimanerai paaqqinniffiullu allatut iliuuseqarnissaanik kaammattuutigisimasinnaasai nalunaarusiani taakkunani atuarneqarsinnaapput.