Kommunip utoqqaat illuanni najugaqartussamik pineqartoq akuersitinnagu inissiisimanera pissaanermillu atuisarneq pillugu inatsimmi malittarisassanik malinnissimannginnera isorisariaqarluinnarpoq

Kommuni Kujalliup utoqqaat illuanni najugartussamik inissiisimanera pillugu suliaq Ombudsmandip nammineerluni misissuiffigaa.

Ombudsmandi oqaaseqaammi eqikkaalluni inerniliivoq kommunip A-mik utoqqaat illuanni najugaqartussatut taanna akuersitinnagu inissiisimanera kommunillu pissaanermik atuisarneq pillugu inatsimmi taamani atuuttumi najugaqarfimmi najugaqartussatut pineqartoq akuersitinnagu inissiisarneq pillugu aalajangersakkanik malinnissimannginnera isorisariaqarluinnaartuusut.

Ombudsmandi oqaaseqaammi eqikkaalluni inerniliivoq kommunip A utoqqaat illuanni feriarniartoq isumaqalersillugu ingerlatsinermi ileqqorissaarneq unioqqutillugu salloqittarsimammagu tamanna akuerineqarsinnaanngitsoq, pineqartorpiarmi unaasimammat A utoqqaat illuanni ataavartumik najugaqalissasoq kommuni aalajangiisimasoq.
 
Ombudsmandi eqikkaalluni aaammattaaq inerniliivoq suliap ingerlasimaneranik tamarmik kommunip uppernarsaasiisinnaasimannginnera taamalu paasitinneqarsinnaatitaaneq pillugu inatsit tunngavigalugu allattuisussaatitaanerminik eqqortitsisimannginnera isorisarialiusoq.

Ombudsmandi naliliivoq suliami annertunerusutigut kukkussuteqartoqarsimasoq sumiginnaasoqarsimasorlu, taamaattumillu Inatsisartut Inatsisinut Ataatsimiititaliaat aamma kommunalbestyrelsi oqaaseqaammik Ombudsmandi pillugu inatsimmi § 23 tunngavigalugu nalunaarfigai.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiariniarneqarsinnaapput.

Inummik najuqarfittut neqeroorummi najugartussamik pineqartoq akuersitinnagu inissiineq
Kommunimi uninngavigisami kommunalbestyrelsip inuk nuunnissamut pinaasertoq imaluunniit paasitinneqarnini tunngavigalugu tamatumunnga akuersinissaminut pisinnaasaqanngitsoq najugaqarfittut neqeroorummi aalajangersimasumi isumaginninneq pillugu inatsiseqartitsineq tunngavigalugu inissinneqassasoq aalajangeeqqullugu Ilaqutariinnut Naalakkersuisumut inassuteqaateqaatigisinnaavaa, tak. isumaginninnermik suliassaqarfimmi pissaanermik atuineq pillugu Inatsisartut inatsisaanni nr. 1-imi, 21. november 2013-imeersumi § 36, imm. 1.

Aalajangersagaq taanna inunnut tarnikkut pissutsimikkut annertuumik ataavartumillu piginnaasakillisimasunut tunngasuuvoq. Pissaanermik atuisarneq pillugu inatsimmi taamani atuuttumi § 36, imm. 1-ikkut aalajangersarneqarpoq najugaqarfittut neqeroorummi najugaqartussatut pineqartumik akuersisitsinani inissiisoqassappat pineqartup pisariaqartitaminik ikiorserneqarnissaanut tamanna pisariaqarluinnassasoq, ikiuineq pineqartup angerlarsimaffiani ingerlanneqarsinnaassanngitsoq, pineqartup iliuutsimi kingunerisai paasisinnaassanngikkai, pineqartoq imminut annertuumik ajoqusernissamut imminut ulorianartorsiortissasoq nuunnissaatalu isumagineqannginnera illersorneqarsinnaassanngitsoq piumasaqaataasoq.

Kommunalbestyrelsip naliliinermini taamaattoqarpat uiusup nuliaasulluunniit, inooqataasup allatulluunniit ilaqutaasup inuup pineqartup pisariaqartitaanik ikiuunnissamik nakkutilliinissamillu isumaginnissinnaajunnarsimanera aamma ilaatissavaa. Tamanna pissaanermik atuisarneq pillugu inatsimmi taamani atuuttumi § 36, imm. 4-kkut aalajangersarneqarpoq.

Inassuteqaat pissutsinik erseqqinnerusumik taaneqartunik arlalinnik imaqassaaq. Tamanna pissaanermik atuisarneq pillugu inatsimmi taamani atuuttumi § 42-kkut aalajangersarneqarpoq.

Aalajangersakkat taakku pissaanermik atuisarneq pillugu inatsimmi massakkut atuuttumi uani ingerlateqqinneqarput: Isumaginninnermik suliassaqarfimmi pissaanermik atuineq pillugu Inatsisartut inatsisaanni nr. 8-mi, 20. juni 2022-meersumi, taannalu 1. januar 2023-mi atuutilerpoq. Pissaanermik atuisarneq pillugu inatsimmi massakkut atuuttumi §§-it 36 aamma 37 innersuussutigineqarput. Pissaanermik atuisarneq pillugu inatsimmi massakkut atuuttumi kommunimi najugarivitami kommunalbestyrelsi tassaavoq Ilaqutariinnut Naalakkersuisumut inassuteqaateqartussaq.