Qeqqata Kommuniata meeqqanik inissinneqarsimasunik aalajangiinani angerlartitsimanera isorisariaqarluinnarpoq

Suliaq Qeqqata Kommuniata meeqqanik sisamanik angerlartitsineranut tunngasoq Ombudsmandip nammineerluni misissuiffigaa. Meeqqat sisamat taakku angerlarsimaffimmik avataanut 2016-imi nukinginnartumik inissinneqarsimapput. Meeqqat angerlarsimaffimminnut 2018-imi pulaarnerminnut atatillugu anaanaminniiginnarput, naak kommuni angerlartitsisoqarnissaanik aalajangiisimanngikkaluartoq.

Ombudsmandi oqaaseqaammi eqikkaalluni inerniliivoq Qeqqata Kommuniata meeqqat sisamat kommuni angerlartitsisoqarnissaanik aalajangiinngikkaluartoq angerlarsimaffimminnut nuunnerannik akuersaarinninnera akuerineqarsinnaanngilluinnartoq.

Ombudsmandi eqikkaalluni aamma inerniliivoq kommunip inissiisoqarnissaanik aalajangiinermik angerlartitsisoqarnissaanik aalajangiinerup tungaanut atuutsitsisimannginnera akuerineqarsinnaanngilluinnartoq.

Kommuni angerlartitsisoqarnissaanik 2023-mi aalajangiivoq.

Ombudsmandip oqaatigaa kommuni angerlartitsisoqarnissaanik aalajangiinermut atatillugu meeqqat sisamat taakku naammagittaalliornissamut periarfissaq pillugu ilitsersortariaqarnersut naliliisimanngitsoq.

Ombudsmandi naliivoq suliani annertunerusutigut kukkussuteqartoqarsimasoq sumiginnaasoqarsimasorlu, taamaattumillu Inatsisartut Inatsisinut Ataatsimiititaliaat aamma kommunalbestyrelsi tamatuminnga Ombudsmandi pillugu inatsimmi § 23 tunngavigalugu nalunaarfigalugit.

Oqaaseqaat uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiariniarneqarsinnaapput.

Angerlartitsisoqarnissaanik aalajangiineq
Inissiineq inissiinerup siunertaa anguneqarpat, inissiinerup siunertaa eqqortinneqarunnaarpat meerarluunniit 18-inik ukioqalerpat atorunnaarsinneqassaaq. Tamanna meeqqat tapersersorneqarnissaannut Inatsisartut inatsisaanni nr. 20-mi, 26. juni 2017-imeersumi (matuma kingornatigut meeqqanik tapersersuisarneq pillugu inatsimmik taaneqartartussami) § 40-kkut aalajangersarneqarpoq.

Kommunip inissiisoqarnissaanik aalajangiineq angerlartitsisoqarnissaanik aalajangiisoqarnissaata tungaanut atuutsissavaa.

Meeqqanik tapersersuisarneq pillugu inatsit angajoqqaatut oqartussaassutsimik tigummiaqartup meeqqamik angerlarsimaffiup avataanut inissinneqarsimasumik kommunalbestyrelsip angerlartitsisoqarnissaanik aalajangiinissaata tungaanut immini najugaqartitsinissaanut inatsisikkut tunngavissiinngilaq.

Meeqqat naammagittaalliorsinnaatitaanerat
Meeqqat suliani imminnut tunngasuni naammagittaalliorsinnaatitaasut meeqqanik tapersersuisarneq pillugu inatsimmi § 60, imm. 2-kkut aalajangersarneqarpoq.

Kommunip ingerlatsiviata meeqqamik naammagittaalliornissamut periarfissaq pillugu ilitsersuinermini, meeqqap illersorneqarnissaa eqqarsaatigalugu, manna qulakkeertariaqarpaa, tassalu meeraq suliamik naammagittaalliornermut tunngasumik paasinninnissaminut naammattumik inerisimassuseqarnersoq pisut meeqqallu ataasiaakkaarlugit naliliisoqassasoq.