Innuttaasup saaffiginninneratigut ombudsmandi aalajangersimavoq suliamik misissuinermik aallartitsivoq, tassa Kommuneqarfik Sermersuup kommunimi atorfimmut qinnuteqartoq isumaqatiginiareerneratigut, sulinermut atatillugu inissaanik tunisimammagu. Tamannalu pisimavoq, naak atorfiup inuttassarsiorlugu allagarsiinermi inimik najugassamik tunineqarsinnaaneq periarfissaanngikkaluartoq.

Ombudsmandi misissuinermini inerniliivoq, pisortat oqartussaatitaannit pissuserissaarnissamut naapertuutinngitsoq Kommune Sermersuup qinnuteqartumut inimik innersuussisimanera, taamaalilluni atorfiup inuttalerneqarnissaani atugassaritaasoq pingaarutilik paasinerlunneqarsinnaalerluni. Tamanna ombudsmandimit ajuusaarnartutut isumaqarfigineqarpoq.

Ilaatigut ombudsmandimit oqaatigineqarpoq: ”Isumaqarpunga ingerlatsinermi pissuserissaarnissami naapertuunnerpaasimassagaluartoq kommunip atorfik inuttassarsioqqissimagaluarpagu, paasinarsimmat atorfik pineqartoq peqatigitillugu inimik najugassamik neqerooruteqanngikkaanni inuttalerneqarsinnaanngitsoq.”

Suliap suliarineqarnerani Kommuneqarfik Sermersuumit ombudsmandimut oqaatigineqarpoq, kommunip pingaartimmagu qinnuteqartuni piukkunnarnerpaaq atorfinitsinneqassasoq aammalu pisortat oqartussaatitaanni isertuaatsumik atorfinitsitsinerit pisassasut.

Taamaalilluni ombudsmandimit Kommuneqarfik Sermersuup oqaaseqaataa tusaatissatut tiguneqarpoq suliamillu suliaqarnini naammassillugu.

Ombudsmandip oqaaseqaataa ugguuna atuarsinnaavat.

Annertunerusumik paasisaqarusukkuit: oqarasuaat 32 78 10 saaffigisinnaavat.

Ingerlatsinermi pissuserissaarneq pisortanilu atorfinitsitsisarneq
Ingerlatsinermi pissuserissaarneq naatsumik oqaatigalugu tassaavoq, malittarisassat periutsillu ileqquusut, pisortat oqartussaatitaasa, assersuutigalugu kommunit innuttaasunut qanoq pinnissinnaanerannut tunngasut.

Ingerlatsinermi pissuserissaarnissaq malillugu oqartussaasoq ima iliorniartussaavoq, innuttaasup pisortat oqartussaatitaannut tatigininnera annertusassallugu. Innuttaasut oqartussaasup tamatigut piviusorsiortumik, tunngavissat naapertorlugit aamma eqqortumik tamatigut iliuuseqartarnerannik.

Inatsisit malitsigisaasa saniatigut, ingerlatsinermi pissuserissaarnissami periuutsini piumasaqaatit atuupput.

Pisortani atorfinitsitsisarnerit, nalinginnaasumik namminersortut atorfinitsitsisarnerannit allaanerupput, pisortani atorfinitsitsisarnerit atorfinitsitaanermi inatsisitigut malittarisassatiguinnaanngitsoq nalimmassarneqartarmata, aammali ingerlatsineq pillugu inatsiseqartitsinikkut aamma nalinginnaasumik ingerlatsinikkut tunngaviusumik malitassatigut nalimmassarneqartarlutik. Allatut oqaatigalugu, pisortat oqartussaatitaat sulisunik atorfinitsitsinerminni aamma malittarisassat qimerloortussaavaat, pisortat ingerlatsinissaanni atuuttut.

Aallaaviuvoq atorfinitsitsinermi sulisitsisup kiffaanngissuseqarluni naliliineratigut, atorfinitsitsineq malittarisassat tunngavigalugit pissasoq, taamaattorli inatsit aamma ingerlatsineq pillugu inatsiseqartitsinermi periutsit, soorlu assigiimmik pinninnissamik tunngaveqarluni, pinngitsoorani piviusorsiornissamik assigisaallu qimerloorneqarnissaat. Pisortani atorfinitsitsinermi aalajangiisuusartoq tassaavoq, pisortaatitamit qulakkeerneqassammat qinnuteqaatit tamarmik assigiimmik tunuliaquteqartinneqarlutik tunniunneqassammata, aamma atorfinitsinneqartoq ataatsimut nalilersuinermi atorfimmut piukkunnarnerpaajussammat. Tamatuma kingunera imaappoq, pisortat oqartussaatitaa atorfimmut inuttaliukkumasaminik piviusorsiortumik nalilersuissasoq, taamaalilluni toqqaannartumik toqqaannanngitsumilluunniit qinnuteqartut akornanni immikkoortitsinermik pisoqaqqunagu.

Taamaalilluni pisortat oqartussaatitaat pisussaafeqarpoq atorfik inuttassarsiugaq tamanut saqqummiutissallugu, tassuuna qinnuteqartunit piukkunnarnerpaamik atorfik inuttalerniassallugu.