Sisimiuni innuttaasut periarfissaqarput Inatsisartut Ombudsmandiat sulisuilu oqaloqatigissallugit 12. september 2024-mi. Tassani ombudsmandip suliai paasisaqarfigineqarnerusinnaapput, naammagittaalliorsinnaanerlu pillugu periarfissanik ilitsersortittoqarsinnaalluni.

Kikkulluunniit ombudsmandi sulisuilu oqaloqatiginissaanut tikilluaqquneqarput. Suliamik aalajangersimasumik eqqartueqateqarusukkuit, qinnuigaatsigit pisortat oqartussaatitaannit suliaq pillugu allagaqarpat taakkua nassaqqullugit. Inuk alla sinnerlugu naammagittaalliuteqarniaruit, eqqaamassavat taassuma pisinnaatitsissusiaa nassassagakku.

Ombudsmandi sulisuilu naapinneqarsinnaapput piffissami:

Sisamanngorneq 12. september 2024 nal. 16-18 katersortarfimmi

OMBUDSMANDIP SUNIK IKIORSINNAAVAATIT?
Ombudsmandimit suliarineqarsinnaapput pisortat ingerlatsiviini Namminersorlutik Oqartussat aamma kommunit pillugit naammagittaalliutit. Ilaatigullu ombudsmandimit suliarineqarsinnaasarlutik Greenland Business A/S aamma INI A/S pillugit naammagittaalliutit. Ombudsmandimilli suliarineqarsinnaanngillat assersuutigalugu eqqartuussivinnit, politiinit imaluunniit pinerluuteqarsimasunut isumaginnittoqarfik pillugit naammagittaalliutit.

Ombudsmandimut naammagittaalliutigisinnaavatit pisortat oqartussaatitaannit aalajangiinerit, soorlu pisortat ikiorsiissutaannik qinnuteqarnermi, aalisarsinnaanermut akuersissut imaluunniit allagaatinik takunnissinnaatitaaneq pillugit itigartitsissutit, aamma pisortat oqartussaatitaasa pissusilersornerat, soorlu ataqqinninnginneq aamma nikassaanertut nipilimmik oqaatsinik atuineq.

Aamma pisortat oqartussaatitaannit suliap suliarineqarnerani piffissaq atorneqartoq sivisuallaar-pat imaluunniit akissutisisimanngikkuit ombudsmandimut naammagittaalliutigisinnaavatit.

Ombudsmandimut naammagittaalliuteqannginnermi suliaq pillugu allanik naammagittaalliorfissanik peqarpat taanna atoqqaarsimasariaqarpoq.

Ukioq ataaseq qaangiutsinnagu ombudsmandimut naammagittaalliortoqassaaq.