Inatsisartut Ombudsmandeqarfiani misissuiartortitat ulloq unnuarlu paaqqinnittarfimmi Angerlarsimaffik Pallermi Paamiuniittumi misissuineq maj 2023-mi ingerlappaat. Palleq tassaavoq ulloq unnuarlu paaqqinnittarfik inersimasunut ineriartornermikkut akornuteqartunut qanimut ikiorneqarnissamik aamma ikorfartorneqarnissamik pisariaqartitsisunut angerlarsimaffik. Misissuineq ingerlanneqarpoq ombudsmandip nalinginnaasumik suliaanut atatillugu, taamaalilluni ulloq unnuarlu paaqqinniffimmi aalajangersimasumik naammagittaalliuummik tunngaveqarani.

Ataatsimut isigalugu ombudsmandi isumaqarpoq, najugaqartut toqqissisimarpasissut Pallermilu najugaqarnertik nuannaralugu, kiisalu sulisunit najugaqartut pisariaqartitaat eqqumaffigineqarlutik. Najugaqartut ineeraat nammineq pisatsersugaapput aamma isersimaartarfik nerisarfillu alianaallutik angerlarsimaffippalaartumik pisatsersugaallutik. Aamma ombudsmandimit maluginiarneqarpoq najugaqartut amerlanersaat Pallermi sammisassaqartitsivimmi peqataasarnerat, najugaqartullu pinngortitamut pisuttuartarlutik illoqarfimmilu sammisassaqartitsinernut peqataasarlutik.

Taamaakkaluartorli ombudsmandip nalunaarusiami oqaatigivai pissutsit oqaaseqarfiginissaanut pissutissaqalersitsisut. Nalunaarusiami ombudsmandip isornartorsiorpaa, Pallermi pissaanermik atuisarneq pillugu inatsimmi aalajangersakkat sulisut ilitsersorneqarnissaat pillugu inatsisip imarisaanik pineqartuni naammattumik eqqumaffigineqannginneri, kiisalu sulisut tamanna pillugu ilitsersorneqareerunik uppernarsaallutik atsiortussaatitaanerat pillugu. Aamma ombudsmandimit isornartorsiorneqarpoq, Pallermiit kommunit sumiifiitaamma angerlarsimaffiusut pissaanermik atuisarneq pillugu paasissutissiissutigineqartarsimannginneri pillugit, Pallerup Isumaginninnermi Aqutsisoqarfimmut paasissutissiissutigisaatut.

Ombudsmandimit aamma ilaatigut isornartorsiorneqarpoq, Pallerup najugaqartunut ineriartornermut pilersaarutinik peqannginnera, aamma najugaqartut nalunaarfigineqarsimannginneri ineeqqaminni pujortarsinnaatitaanerat pillugu, kiisalu Pallermi najugaqartunut tigoriaannarnik illup iluani malittarisassanik peqannginnera pillugu.

Naggataatigullu ombudsmandi aalajangersimavoq pissutsit marluk immikkoortinniarlugit. Siulleq najugaqartumut tunngassuteqarpoq, oqaatigineqartut naapertorlugit sullitassat avataaniittoq, 2018-imili allamut inissinneqartussaagaluarluni, sulili nuussimanngitsoq. Suliap aappaani pissutsini pineqarpoq, ombudsmandip naliliinera malillugu, ulloq unnuarlu paaqqinniffimmi aamma allatut najugaqatigiiffinni, inersimasut timikkut imaluunniit tarnikkut annikinnerusumik pisinnaasallit sinnerlugit akisussaasulerneqarsimannginneri, sulisut ilitsersuutinik atorfissaqartitsisinnaanerat najugaqartut pigisaasa qanoq iliuuseqarfiginissaat pillugu.

Nalunaarusiaagallartumut Angerlarsimaffik Palleq aamma Isumaginninnermi Aqutsisoqarfiup ataatsimut oqaaseqaataannut Meeqqanut Inuusuttunullu Naalakersuisoqarfik oqaaseqaateqarpoq. Taamaalilluni Angerlarsimaffik Pallermi misissuineq ombudsmandimit naammassineqarpoq.

Misissuinermi nalunaarusiaq uani atuarsinnaavat.

Annertunerusumik paasisaqarusukkuit: Oqarasuaat 32 78 10

TUNULIAQUTAA

Ombudsmandip misissuiartortarneri

Innuttaasut pisortat ingerlatsinerat pillugu naammagittaalliuutaasa saniatigut, ukiut tamaasa ombudsmandi paaqqinniffinnut innuttaasut sivikinnerusumik sivisunerusumilluunniit najugarisaannut assigiinngitsunut misissuiartortarpoq.

Misissuiartortarnerup siunertarivaa misissussallugit paaqqinnittarfinnit innuttaasut iluamik paaqqutarineqarnersut aamma malittarisassat malinneqarnersut. Misissuinerni ombudsmandip sulisuisalu misissortarpaat init, oqaloqateqartarlutillu pisortaqatigiinnik, sulisunik, najugaqartunik aamma najugaqartut ilaqutaannik.

Paaqqinniffiit siumut nalunaarfigineqareertarput. Kisiannili aamma ombudsmandi nalunaarfiginneqqaarani misissuisinnaavoq.

Misissuisoqareeraangat ombudsmandi nalunaarusiortarpoq. Tamatumani atuarneqarsinnaapput misissuinermi ajornartorsiutit suut ombudsmandimit eqqumaffigineqarsimanersut, aamma paaqqinniffiit sutigut allaanerusumik iliorsinnaanerannik ombudsmandi innersuussuteqartarpoq.