Ombudsmandi oqaaseqaatimi nutaami inerniliivoq, Kommune Kujalleq     innuttaasup siusinaartumik sulisinnaajunnaarnersiuteqalerniarluni qinnuteqaataa naammaginartumik sivisussusilimmik suliarisimanngimmakkaa.

Innuttaasoq 17. december 2018, 25. april 2019 aamma 13. april 2023-mi siusinaartumik sulisinnaajunnaarnersiuteqalerniarluni qinnuteqarpoq. Innuttaasup qinnuteqaqattaarneri nukingisaarinertut ombudsmandimit isigineqarput.
 
Siusinaarluni sulisinnaajunnaarnersiuteqalerniarluni itigartitsissut kommunit aatsaat 28. juni 2024-mi aalajangiivigineqarpoq.

Kommunimit piffisaq suliap suliarineqarneranut atorneqartoq ukiut arfinilissaata affaanik sivisutigisoq ombudsmandimit isorisarialerujussuartut isumaqarfigineqarpoq.

Aamma ombudsmandip oqaaseqaatimi isornartorsiorpaa, kommunimit suliami allagaatit 2008-miit 2016-ip tungaanut pigineqannginneri tassa tammarsineri, taamatullu kommunimit piffissaagallartillu suliami allagaatit arlallit nalunaarsorneqarlutik allattorneqartarsimannginneri.

Tamanna tunngavigalugu ombudsmandi isumaqarpoq kommunimit allagaateqarneq pillugu inatsisip malittarisassai malinneqarsimanngitsut.

Ombudsmandip oqaaseqaataa ugguuna atuarsinnaavat.

Annertunerusumik paasisarasukkuit sianerfissaq: oqarasuaat 32 78 10.

Sooq piffissaq suliap suliarineqarneranut atorneqartoq sivisuallaarpa?
Najoqqutassamik malittarisassaqanngilaq pisortat oqartussaatitaanit suliap suliarineqarnerani piffisaq qanoq sivisutigisoq atorneqassanersoq. Naatsumilli oqaatigalugu allaffissornermi ileqqorissaarnissap malitsigivaa, sapinngisamik isummannaatsumik piaartumillu suliat suliarineqartarnissaat.

Suliat asuli kinguarsarnagit suliarineqarsimanerannik apeqqummi ilaatigut apeqqutaapput suliap qanoq ittuunera, suliani assingusuni pisortat suliaqarneranni piffissaq atorneqarajunnersoq, suliap sannamigut qanoq ajornakusoortiginera kiisalu, piffissartornartumik suliap siuariaatissaatigut qulaajaasoqassanersoq.

Ingerlatsinermi pisortat oqartussaatitaasa nalunaarsuinermi allattuisarnermi suut malittarisassarivaat
Najoqqutassamik inatsisitigut malittarisassiaqanngilaq pisortat oqartussaatitaasa allagaatinik nalunaarsuinermi allattuisarnissaat pillugu. Suliamili suliap suliarineqarnissaani allagaat pingaaruteqarpat, ingerlatsinermi pissuserissaarnissap malitsigivaa, ilaatigut allagaatit tiguneqartut nassiunneqartulluunniit suliaqarnermi allaffissornermut ilaatillugit nalunaarsorlugit allattoqartarnissaat.

Suliap puigorneqannginnissaanut aamma pisortanut saaffiginnissutit tiguneqartut eqqortumik nalunaarsorlugit allattorneqartarnissaanni tunngaviussaaq, pisortat naammattumik sunniuteqarsinnaasumillu aaqqissuussaasumik eqqaamannissutissamik peqarnissaat.