Kommune Kujalliup innuttaasumut aalajangiinermini oqaatsit atugai ajuusaarnarluinnartut pillugit

Ombudsmandi Kommune Kujallermi innuttaasumut aalajangiissuteqarnermini oqaatsit atugai pillugit nammineerluni misissuinermik aallarti-tsivoq.

Ombudsmandi oqaaseqaateqarnermini naliliivoq, ajuusaarnartorujussuusoq Kommune Kujalliup oqaaseqaatiliornermini oqaatsit atorsimammagit: ”Naliliinerput naapertorlugu assut isumakulunnarpoq, meeraq pingasuinnarnik ukiulik allaat suna toqqissisimanarnerunersoq nammineq aalajangiisinnaasutut isigisinnaagakku.” kiisalu ”Meeqqavit isumannaatsumik sutigut tamatigut inerikkiartorlutik inuuneqarnissaat siulliunnagi, angutit assigiinngitsut aapparilertarnissaat pissutigalugu meeqqavit pisariaqartitaanik isumaginnissimannginnerit pissutigalugu [meeqqat] immikkut pisariaqartitsilersimammat ikiorsiivigineqartariaqarpoq.”

Ombudsmandip ataatsimut isigalugu naliliinera unaavoq, oqaatsit aalajangiinermi Kommune Kujalliup oqaaseqaatit atorsimasai, kommunip innuttaasup tungaanut oqariartuuteqartarnissaani ingerlatsinermi pissuserissaarnissamut naapertuutinngitsut, tamatumani qularnarsitinneqarsinnaammat kommunip piviusorsiortumik tunngavissallu naapertorlugit iliortarneranut.

Kommune Kujallermit nammineerlunga suliamik misissuinermik suliaqarninnut atatillugu oqaatigivaa, kommunimit qaqugukulluunniit malinniarneqartartoq ingerlatsinermi pissuserissaarnissaq. Aamma kommunimit oqaatigineqarpoq anguniarneqartarlunilu innuttaasorlu tatigeqatigiinnissaq. Aamma kommunimit oqaatigineqarpoq aalajangiinermi oqaatsit atorneqartut kommunimit ataasiaannarluni pisutut isigineqartut.

Kommune Kujalliup oqaaseqaataa ombudsmandimit tusaatissatut tiguneqarpoq, suliamillu suliaqarnini naammassillugu.

Ombudsmandip oqaaseqaataa uani atuarsinnaavat.

Allanik paasisaqarusukkuit saaffissaq: tlf. 32 78 10.

Ingerlatsinermi pissuserissaarneq sunaava?

Ingerlatsinermi pissuserissaarneq naatsumik oqaatigalugu tassaavoq, malittarisassat allassimanngitsut aamma periuutsit, pisortat oqartussaatitaannit, assersuutigalugu innuttaasut qanoq kommunimit pineqartariaqarnerat.

Inatsisip malitsigisaanik piumasaqaatigineqartut saniatigut, ingerlatsinermi pissuserissaarnissami periuseq atuuppoq.

Pisortat oqartussaatitaat inussiarnersumik aamma qajassuartumik innut-taasumut pissuseqassaaq. Inussiarnersuunissami qajassuartuunissamilu piumasaqaatini aamma oqaatsit atorneqartut ilaapput, oqartussaasup allakkatigut oqaasiinnarmillu innuttaasumut atugaani. Taamaattumik innuttaasumut allakkat ataqqinnittumik, inussiarnersumik aamma qajassuartumik allanneqassapput.