Kalaallit Nunaanni Ombudsmandeqarfik 1. april 1995-imi pilersinneqarpoq, Folketingillu Ombudsmandia nunarsuarmi Ombudsmandeqarfiit siulliit pingajuattut pilersinneqarsimasoq isiginiarlugu isumassarsiorfigalugulu pilersinneqarsimalluni.

Folketingip Ombudsmandia Namminersornerullutik Oqartussat Kalaallit Nunaanni atuutilersinneqarnerat sioqqullugu tassaasimavoq Kalaallit Nunaanni oqartussaasut pillugit naammagittaalliuutinik suliarinninnissamut pisinnaatitaasoq. Namminersornerullutik Oqartussat atuutilersinneqarnerisigut Kalaallit Nunaanni Ombudsmandeqarfiup Kalaallit Nunaanni oqartussaasut pillugit naammagittaalliuutinik suliarinnissinnaasup pilersinneqarnissaa pisariaqartinneqalersimavoq. Taamaalilluni Folketingip Ombudsmandiata 1985-imi ukiumoortumik nalunaarutaani quppernermit 10-mit erserpoq ingerlatsineq suliassaqarfinni allaffissornikkut aqutsinermi inaarutaasumik aalajangiiviusartoq Kalaallit Nunaanni Namminersornerullutik Oqartussat ataannittoq Kalaallit Nunaanni Namminersornerullutik Oqartussat pillugit inatsisip atuutilersinneqarnerata kingornatigut Folketingip Ombudsmandiata isummerfigisinnaajunnaaraa.

Kalaallit Nunaanni Ombudsmandeqarfiup pilersinneqarnissaa pillugu siunnersuutip Inatsisartuni oqaluuserineqarnera taamani Inatsisartut 1993-imi aallartippaat. Ombudsmandi pillugu inatsisip suliarineqarnera pillugu nassuiaat Inatsisartunut 1993-imi upernaakkut ataatsimiinnermi tunniunneqarpoq. Oqaluuserisaq taanna uani atuarneqarsinnaavoq.

Ombudsmandi pillugu inatsisip suliarineqarnera ingerlaqqippoq, Inatsisartullu Ombudsmandiat pillugu Inatsisartut inatsisissaattut siunnersuut aamma pisortat ingerlatsinerat pillugu Inatsisartut inatsisissaatut siunnersuut Inatsisartut 1993-imi ukiakkut ataatsimiinneranni saqqummiunneqarlutik. Oqaluuserisaq taanna uani atuarneqarsinnaavoq.

Inatsisissatut siunnersuutit Inatsisartut 1994-imi upernaakkut ataatsimiinneranni inaarlugit oqaluuserineqarput akuerineqarlutillu. Oqaluuserisat taakku uaniuanilu atuarneqarsinnaapput.

Kalaallit Nunaanni ombudsmaneqarnerup inatsiseqartitsinikkut tunngavigisai tassaapput Inatsisartut Ombudsmandiat pillugu Inatsisartut inatsisaat nr. 7, 13. juni 1994-imeersoq, pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq aamma pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaat nr. 9, 13. juni 1994-imeersoq.

Kalaallit Nunaanni Namminersornerullutik Oqartussat “Suliassat suliarineqartar-nerat pillugu inatsit pillugu ilitsersuut” 1994-imi decemberimi saqqummersippaat, taannalu uani atuarneqarsinnaavoq.

Inatsisartut Ombudsmandiat pillugu Inatsisartut inatsisaat nr. 7, 13. juni 1994-imeersoq

Inatsisartut Ombudsmandiat pillugu Inatsisartut inatsisaata nr. 7-ip, 13. juni 1994-imeersup akuerineqarneratigut Ombudsmandeqarfik 1. maj 1995-imi pilersinneqarpoq.

Inatsisartut inatsisaat taanna uani atuarneqarsinnaavoq. Inatsit pillugu oqaaseqaatit uani atuarneqarsinnaapput, isumaliutissiissullu uani atuarneqarsinnaalluni.

“Ombudsmandip sulinera pillugu Aalajangersakkat Nalinginnaasut” Inatsisartut inatsisaanni § 3 tunngavigalugu aalajangersarneqarput. Ombudsmandip sulinera pillugu Aalajangersakkat Nalinginnaasut uani atuarneqarsinnaapput.

Inatsisartut Ombudsmandiat pillugu Inatsisartut inatsisaat nr. 8, 3. december 2009-meersoq

Inatsisartut inatsisaat Ombudsmandillu sulinera pillugu aalajangersakkat nalinginnaasut Ombudsmandip sulinerani 2009-p tungaanut inatsiseqartitsinikkut tunngaviupput, Inatsisartullu Ombudsmandiat pillugu inatsit nr. 7, 13. juni 1994-imeersoq 2009-mi atorunnaarsinneqarpoq, Inatsisartut Ombudsmandiat pillugu Inatsisartut inatsisaat nr. 8, 3. december 2009-meersoq Inatsisartut akuerimmassuk. Ombudsmandip misissuinernik suliaqarnera inatsisikkut tassuuna saqqumilaarnerulersinneqarpoq, Ombudsmandillu misissuinerni pisinnaatitaanera OPCAT tunngavigalugu misissuinernik ingerlatsisinnaatitaalerneratigut annertusineqarluni. “Ombudsmandip sulinera pillugu Aalajangersakkat Nalinginnaasut” atorunnaarsinneqarput, Inatsisartullu inatsisaanni tamatumunnga peqatigitillugu ilanngunneqarlutik.

Inatsit uani atuarneqarsinnaavoq. Inatsit pillugu oqaaseqaatit uani atuarneqarsinnaapput, isumaliutissiissullu uaniuani atuarneqarsinnaalluni.

Inatsisartut Ombudsmandiat pillugu Inatsisartut inatsisaat nr. 7, 1. juni 2017-imeersoq

Ombudsmandip misissuinernik suliaqarnera Inatsisartut Ombudsmandiat pillugu Inatsisartut inatsisaata nr. 7-ip, 1. juni 2017-imeersup akuerineqarneratigut annertusineqarpoq, ilaatigut Ombudsmandip paaqqinniffinni namminersortuni kiffaanngissusiiagaasimasut atugaannik massakkut misissuisinnaalersinneqarneratigut.

Inatsit uani atuarneqarsinnaavoq. Inatsit pillugu oqaaseqaatit uani atuarneqarsinnaapput, isumaliutissiissullu uani atuarneqarsinnaalluni.