Marlunnik pissarsiorpugut (fuldmægtigitut, immikkut siunnersortitut imaluunniit siunnersortit pisortaattut) decemberip aallaqqaataani 2024-mi isumaqatigiissuteqarnikkulluunniit atorfinittussanik.

Namminersorlutik Oqartussat Nunatsinnilu kommunit inatsisiliornermik atuuttumik malinninnerannik nakkutiginnittussatut Ombudsmandi toqqarneqarpoq.

Innuttaasunit naammagittaalliuutinik annertunerusumik suliaqartarpugut. Tamatuma saniatigut aamma nammineerluta suliniuteqarnikkut misissuiffigisassanik suliaqartarpugut, soorlu assersuutigalugit sammisat naammagittaalliuut imaluunniit tusagassiuutini sammineqartut immikkut aallaavigalugit, soorluttaaq kommuninut angalanerit paaqqinnittarfinnullu nakkutilliiartornerit aamma ingerlanneqartartut. Tamanna isornartorsiuisoqarneranik imaluunniit oqartussat aalajangiinerminnik suleriaatsiminnilluunniit nalilersueqqinnissaannik peqquneqarnerannik kinguneqarsinnaavoq, suliami ombudsmandimit oqaaseqaatigineqartut tunngavigalugit.

Sulianik suliarinninneq inatsisilerinermi pisortaq inatsisilerituutullu sullissinermik suliaqartut allat suleqatigalugit ingerlanneqassapput. Sulianik suliarinnittup sulinini annertuutigut nammineq pilersaarusiorsinnaavaa suliakkiissutigineqartullu naammassineqarnissaasa tungaannut malinnaavigisinnaallugit.


Ujartorpagut
•    Inatsisilerinikkut sullissisut inatsisilerinermik suliaqartussat, oqaaseqaasiornerni allatulluunniit inatsisilerinermi annertunerusumik suliasat, misissuiartornerit naammassineqarnissaat, naammagittaalliutinik suliaqarneq, pisortani atorfeqartunik pisortat pillugit inatsiseqarnermik pikkorisaaneq il.il.

imaluunniit, allaffissornikkut sullissisumik, ombudsmandeqarfimmi allaffissornikkut suliassanik suliaqartussamik, soorlu ombudsmandip ukiumoortumik nalunaarutaata saqqummiunneqarnissaanut ataqatigiissaarineq, nittartakkap nutarsartarnissaa, ombudsmandeqarfimmi qarasaasiatigut atortunik pisiniartarneq inerisaanerlu, HR-imi suliassat il.il. Tamakku saniatigut ombudsmandeqarfiup inatsiseqarnermi pisortaa isumaqatigalugu inatsisilerinermik suliaqartassaaq.

Atorfimmut piginnaasassat
•    Inuiaqatigiilerinermi ilisimatusarnermik ilinniagaqartuunissaq (kandidatitut imaluunniit bacheloritut) soorlu cand.jur., bach.jur., cand.polit., cand.scient.adm., cand.scient.pol. atuagarsornikkut piginnaasaqarluarlutit allattariarsornikkullu oqaaseqatigiiliullaqqissuullutit
•    Pisortat pillugit inatsiseqarnermik immikkut ingerlatsinerlu pillugu inatsiseqarneq pullaviginerorusullugu imaluunniit suliassat allaffissornermut tunnganerusunut soqutigisaqartuuvutit
•    Ajornartorsiutinik pisariusunik assigiinngiiaartunillu paasinnillaqqissuuvutit
•    Akisussaassuseqarluartuuvutit suliassatillu namminersuullugit suliarisinnaallugit
•    Assingusumik misilittagaqareerputit, soorlu assersuutigalugu qitiusumik allaffeqarfissuarmit, eqqartuussivinnit, kommuninit imaluunniit eqqartuussissuserisutut suliaqarfimmit. Ilinniakkaminnik naammasserlaat aamma ilaatinneqarsinnaapput.

Kikkuuvugut
Suliffipput mikisunnguuvoq, maannakkut sulisorineqartut tassaallutik ombudsmandi, inatsisilerinermi pisortaq nutserisullu pisortaat. Taakku saniatigut inatsisilerituutut sullissinermik suliaqartut sisamaapput, nutserisoq ataaseq allatsilu.  

Suliffik pitsaasoq sulinermilu pitsaasunik avatangiiseqartoq, suliassallu tamarmiusut naammassiniarneranni ikioqatigiiffiusoq neqeroorutigaarput.

Pingaartumillu ilinniakkaminnik naammasserlaanut neqeroorutigaarput inatsisilerinikkut pitsaasumik, patajaatsumik tamatigoortumillu ilinniartitsinissaq, tamannalu inatsisilerituutut kingusinnerusukkut sulinermi qaffakkiartornissamut iluaqutigilluarsinnaassavat.

Piffissaq suliffiusoq sapaatit akunnerannut nalunaaquttap akunnerinik 40-nik sivisussuseqarpoq. Qaangiuttoorluni sulineq nalinginnaasuunngilaq. Piffissat suliartorfiusartut soraarfiusartullu nikerartinneqarsinnaapput pissutsillu allatigut aamma eqaatsuullutik.

Sulisunut inissiamik inissaqartitsivugut, malittarisassat atuuttut malillugit akilersor-neqartussamik. Atorfinikkiartorlutit angalanerit pisattavillu assartorneqarnerat akilissavagut. Ukiut pingasut atorfeqartitaareerlutit soraaruit angalanermut pequtillu assartornerinut aningaasartuutinik akiliunneqassaatit.

Akissarsiat atorfinitsitsinermilu atugassarititaasut
Inatsisilerituutut sullissinermi akissarsiat atorfinitsitsinermilu atugassarititaasut Inatsisartut Siulittaasoqarfiata DJØF-illu isumaqatigiissuteqarnerisigut aalajangersarneqartarput. Tunngaviusumik akissarsiat tapillu Kalaallit Nunaanni qitiusumik allaffeqarfissuarmi fuldmægtigit akissarsiaannut naapertuupput. Taakkua saniatigut ukiut qassit sulisimaneq tunngavigalugu soraarnerussutisiaqaataasussanik tapeqarpoq qaammammut ikinnerpaamik 3.666,32 kr.-nik. Piginnaasaqassuseq aallaavigalugu tapit isumaqatigiinniutigineqarnissaannut periarfissaqarpoq, taamatuttaarlu aqutsinikkut suliassamik isumagisassinneqarnermi tassunga qaammatikkuutaartumik tapiliisoqarnissaanut periarfissaqarluni.
Allaffissornikkut sullissisutut atorfinitsinneqarneq piumaarpoq qinnuteqartup ilinniagaa aallaavigalugu isumaqatigiissutit atuuttut malillugit.

Suliffimmit allamit sulinngiffeqarallarsinnaanermut periarfissaqarpoq
Naalagaaffimmi tjenestemandit AC-llu isumaqatigiissutaat arlallit tunngavigalugit atorfeqartitaasut Namminersorlutik Oqartussat ataanni atorfinitsinneqarnermut atatillugu akissarsiaqaratik sulinngiffeqarallarsinnaatitaapput. Sulinngiffeqarallarsinnaatitaaneq pillugu aalajangersakkani katissimallugit aapparisat inooqatigisallu pineqartunut aamma ilaatinneqarput.

Aamma eqqumaffigineqassaaq Namminersorlutik Oqartussat ataanni atorfinitsinneqarnermut atatillugu sulinngiffeqarallarnissamik qinnuteqaatit akuersaarneqartarnissaat Danmarkimi Indenrigsministereqarfiup kommuninut nunallu immikkoortuinut inassuteqaatigisimammagu.

Namminersorlutik Oqartussani kommunimiluunniit atorfeqaruit ukiut suliffigisimasavit amerlassusaannik katersat uatsinni atorfinitsinneqarninni pigiinnassavatit.

Qinnuteqaat
Qinnuteqaat suliffigisimasat allattorsimaffiannik (CV-mik), bacheloritut kandidatitullu soraarummeernermut, matumani karakterit allattorsimaffii ilanngullugit eqqarsaatigalugit, uppernarsaatinik allagaatinillu allanik tamatumunnga tunngasuteqartunik ilaqartinneqartoq e-mailikkut job@ombudsmand.gl-imut nassiunneqassaaq.

Qinnuteqaat kingusinnerpaamik sapaammi 20. oktober 2024-mi tigoreersimassavarput.
Atorfinitsitsiniarluni oqaloqatiginninnerit sapaatit akunneranni 43-mi ingerlanneqarnissaat naatsorsuutigineqarpoq.

Atorfik Kalaallillu Nunaanni najugaqarneq sulinerlu pillugit ataatsimuunerusoq paasissutissat immikkut siunnersortimut Henrik Bach oqarasuaatikkut +299 32 78 10-kkut nal. 10-14 saaffigalugu pissarsiarineqarsinnaapput, pingasunngornerlu saaffiginnissutinut matoqqasarpoq (Danmarkimit sianeruit Danmarkimi nalunaaquttap Kalaallit Nunaanni nalunaaquttamit nal. ak. pingasunik siulliunera eqqaamajuk).

Tusagaqarfiginissat qilanaaraarput.