Inatsisartut ombudsmandiat inatsisilerituumik misilittagartuumik pikkorissu-millu inatsisilerinermi pisortatut atorfimmut inuttassarsiorpoq. Atorfik decem-berip aallaqqaataani 2024-mi isumaqatigiissuteqarnikkulluunniit atorfinittussamik inuttalerniarneqarpoq.

Namminersorlutik Oqartussat Nunatsinnilu kommunit inatsisinik atuuttunik malinninnerannik ombudsmandi nakkutiginnittuuvoq.

Innuttaasunit naammagittaalliuutinik annertunerusumik suliaqartarpugut. Tamatuma saniatigut aamma nammineerluta suliniuteqarnikkut misissuiffigisassanik suliaqartarpugut, soorlu assersuutigalugu sammisat naammagittaalliuut imaluunniit tusagassiuutini sammineqartut immikkut allaavigalugit, soorluttaaq kommuninut angalanerit paaqqinnittarfinnullu nakkutilliiartornerit aamma ingerlanneqartartut. Tamanna isornartorsiuisoqarneranik imaluunniit oqartussat aalajangiinerminnik suleriaatsiminnilluunniit nalilersueqqinnissaannik kaammattuinermik kinguneqarsinnaavoq, suliami ombudsmandimit oqaaseqaatigineqartut tunngavigalugit.

Sulianik suliarinninneq inatsisilerinermi pisortaq inatsisilerituutullu sullissinermik suliaqartut allat suleqatigalugit ingerlanneqassapput.

Atorfik pillugu
Inatsisilerinermi pisortaq tassaavoq ombudsmandip qaninnerpaatut inatsisitigut apeqqutini siunnersortaa isumasioqatigisartagaalu. Aamma inatsisilerinermi pisortaq ombudsmandeqarfimmi inatsisitigut allaffisornikkullu pisortaavoq, immikkut suliassani pitsaasumik kinguneqarluartumillu qulakkeerinnittuulluuni.

Inatsisilerinermi pisortatut ilaatigut suliassaraatit:
•    inatsilerinikkut suliaqarnermi siunnersuineq, ataqatigiissaarineq inatsisilerinermilu sullissisunut suliassanik agguataarineq,
•    qajannaatsumik naammagittaalliutinik, nammineerluta misissukkatsinnik suliniutinillu allanik suliaqarneq,
•    pilersaarusiorneq, ataqatigiissaarineq ombudsmandeqarfiullu nalinginnaasuni aamma OPCAT atorlugu suliani misissuiartortarnerini, kiisalu kommuninut tikeraartarnermi allanullu angalanerni peqataasarneq,   
•    inatsisilerinermi sullissisunik atorfinerlaanik ilitsersuineq,  
•    Folketingip ombudsmandeqarfiani, nunanilu avannarlerni aamma nunat tamat ombudsmandeqarfiini atorfilittat suleqatigineri.

Aamma inatsisilerinermi pisortatut akisussaaffigivatit ulluinnarni allaffisornermi suliassat, inatsisilerinermi sullissisut suleqatigalugit suliarineqartartut. Tassunga ilanngullugu ilaatigut nalinginnaasumik allaffissornikkut suleriaasiliorneq kiisalu aningaasaqarnermik aqutsineq.

Qinnuteqartoq pillugu
Illit
•    inatsisilerituutut ilinniarsimasuuvutit atuagarsornikkullu piginnaasaqarluarlutit,
•    namminersorlutik oqartussat aamma nunatsinni kommunit inatsisinik atuuttunik malinninnissaannut nakkutilleerusussuseqarputit,   
•    pisortani misilittagaqarlutit, soorlu ingerlatsinermi- aamma nakkutilliinermi oqartussanit imaluunniit, eqqartuussivinnit,
•    pisortatut aqutsinermik misilittagaqarputit, pisortallu ataavartumik ineriartortitserusussuseqartuullutit,   
•    inunnik assigiinngitsunik tunuliaqutalinnik suleqateqallaqqipputit,    
•    naleqqanut tappipputit aamma aaqqissuussaasumik sulisinnaavutit,   
•    ammasuuvutit, ilakkuminarputit allaffiullu nuannersuunissaanut tunniusassaqarsinnaallutit.   

Neqeroorutigaavut
Inatsisartut ombudsmandeqarfianni pingaartitaraarput persuarsiunngitsumik suliffeqarnissarput, oqallittarnerit ilinniakkatigullu avitseqatigiittarnerit inissaqartinneqarput. Sulisut toqqissisimanissaat ilisimassallu ineriartortinneqarnissaat ukkataralugit, aamma periarfissaqarpoq suliffitsinni avataaniluunniit pikkorissarsinnaaneq, taamatullu aamma nammineerluni tunniussaqarnissaq ilinniartitsinissarlu periarfissaalluni.

Sulisunut inissiamik inissaqartitsivugut, malittarisassat atuuttut malillugit akilersorneqartussamik. Atorfinikkiarlutit angalanerit pisattavillu assartornerat akilissavagut. Ukiut pingasut atorfeqartitaareerlutit soraassaguit angalanermut pequtillu assartorinerinut aningaasartuutinik akiliunneqassaatit.

Suliffipput mikisunnguuvoq, maannakkut sulisorineqartut tassaallutik ombudsmandi, inatsisilerinermi pisortaq nutserisullu pisortaat. Taakku saniatigut inatsisilerituutut sullissinermik suliaqartut arfiniliupput nutserisoq allatsilu. Illit ombudsmandi aamma nutserisunut pisortaaq peqatigalugit ombudsmandeqarfimmi pisortaqatigiinnut ilaassaatit.

Akissarsiat atorfinitsitsinermilu atugassarititaasut
Aallaavittut immikkut isumaqatigiissusiornikkut piginnaasat aallaavigalugit aningaasarsialiisoqassaaq, aningaasarsiatigut sinaakkusiussani 39 imaluunni-it 40 (imm. 3 imaluunniit 3 a) (niveau 2) 20. oktober 2020-mi Naalakkersuisut aamma Akademikerorganisationit (ataatsimut pisortat pillugit isumaqagiissut) akornanni isumaqatigiissut malillugu. Qaammammut aningaasarsiat tapit ilanngullugit katillugit 81.924,85 kr.-upput (aningaasarsia-tigut sinaakkusiussani 39 – 1. april 2020-meersoq). Taakkununnga ilaatinneqarput soraarnerussutisiassat.

Aallaavittut sapaatip akunneranut suliffiusussaq nalunaaquttap akunnerinik 40-nik sivisussuseqarpoq. Atorfimmut atuuppoq sulinissap sivisunerpaaffilerneqannginnera. Qaangiuttoornersiuteqartitsineq aamma sulinngiffeqarnermi ullut annaasat pillugit aalajangersakkat atuutinngillat.

Allamik atorfeqarnermi sulinngiffeqarnissami periarfissaq
Naalagaaffimmi tjenestemandit AC-llu isumaqatigiissutaat arlallit tunngavigalugit atorfeqartitaasut Namminersorlutik Oqartussat ataanni atorfinitsinneqarnermut atatillugu akissarsiaqaratik sulinngiffeqarallarsinnaataapput.
Sulinngiffeqarallarsinnaatitaaneq pillugu aalajangersakkani katissimallugit aapparisat inooqatigisallu pineqartunut aamma ilaatinneqarput.

Aamma eqqumaffigineqassaaq, Namminersorlutik Oqartussat ataanni atorfinitsinneqarnermut atatillugu sulinngiffeqarallarnissaq qinnuteqaatit akuersaarneqartarnissaat Qallunaat Nunaanni nunamut namminermut ministeriaqarfiup kommuninut nunallu immikkoortuinut inassuteqaatigisimammagu.

Namminersorlutik Oqartussani kommuniniluunniit atorfeqaruit ukiut suliffigisavit amerlassusaanik katersat uatsinni atorfinitsinneqarninni pigiinnassavatit.

Qinnuteqaat
Qinnuteqaat suliffigisimasat allattorsimaffiannik (CV-mik), matumani soraarummeernermi karakterit allattorsimaffii ilanngullugit, uppernarsaatinik allgaatinillu allanik tamatumunnga tunngassuteqartunik ilaqartinneqartoq e-mailikkut job@ombudsmand.gl.-imut nassiunneqassaaq.

Qinnuteqaat kingusinnerpaamik sapaammi 20. oktober 2024-mi tigoreersimassavarput. Atorfinitsitsiniarluni oqaloqatiginninnerit sapaatit akunneranni 43-mi ingerlanneqarnissaat naatsorsuutigineqarpoq.

Atorfik, Kalaallit Nunaannilu najugaqarneq sulinerlu pillugit nalinginnaasumik paasissutissat ersarinnerusut pillugit ombudsmandimut Gedion Jeremiassen oqarasuaatikkut +299 32 78 10-kkut nal. 10-14 saaffigalugu paasiniarneqarsinnaapput, pingasunngornerlu saaffiginnissutinut matoqqasarpoq (Qallunaat Nunaanniit sianeruit, Qallunaat Nunaanni, Kalaallit Nunaanni nalunaaquttap nal. ak. pingasunik siulliunera eqqaamajuk).

Tusarfiginissat qilanaaraarput.