Naammagittaalliuutit Ombudsmandimit tiguneqaruni nalunaarsorneqassaaq. Tassa imaappoq saaffiginnissutit nalunaarsuinermi normulerneqassaaq. Nalunaarsuinermi normu allakkat Ombudsmandip tigusavit teqeqquanni qullermi talerperlermi takusinnaavat.

Suliap ilinnut tunngasup Ombudsmandimit suliarineqarnera ingerlaavartumik ilinnut ilisimatitsissutigineqartassaaq, piffissalli ingerlanerani apeqqutissaqaleruit Ombudsmandimut sianersinnaavutit allassinnaallutilluunniit. Saaffiginninninnut atatillugu suliami ilinnut tunngasuni nalunaarsuinermi normu paasissutissiissutigigukku oqilisaataassaaq.

Naammagittaalliuutit ilanngussartaqarpallu ilanngussartai nalunaarsorneqarnermik kingornatigut inatsisilerituumut suliamik suliarinnittumut tunniunneqassaaq, taassumalu naammagittaalliuutivit tiguneranit sapinngisamik pilertornerpaamik, naammagittaalliuutillu tiguneqarnera taassuma tiguneqarneranit nalinginnaasumik sivikinnerpaamillu ullut qulit iluanni uppernarsassavaa. Inatsisilerituup naammagittaalliuummik suliarinnittup aqqisa aallaqqaataat allakat Ombudsmandimit tigusavit teqeqquanni qullermi talerperlermi takusinnaavat.

Oqartussaasut/inuit naammagittaalliuutigisatit suliamulluunniit ilinnut tunngasumut arlaatigut akuutinneqartut ilisimatinnissaat Ombudsmandip nalinginnaasumik pisussaaffigisussaammagu Ombudsmandilu naammagittaalliortup allagaasa il.il. assilinerinik naammagittaalliuummik suliarinninnerminut atatillugu oqartussaasunut pisut ilaanni nassiussisussaammat eqqumaffigissavat.

Naammagittaalliuutit ilanngussartaqarpallu ilanngussartai nalunaarsorneqareerunik inatsisilerituumut suliamik suliarinnittussamut tunniunneqassapput, taassumalu naammagittaalliuutivit tiguneqarnera taassuma tiguneqarnerata kingornatigut pilertornerpaamik nalinginnaasumillu ullut suliffiusut qulit qaangiutsinnagit ilinnut uppernarsassavaa.

Naammagittaalliuutit Ombudsmandip atuareerpagu Ombudsmandip akissutaanik tigusaqassaatit. Akissuteqarnissamut periarfissat pingasuugajupput:

1. Ombudsmandi misissuinermik sukumiinerusumik aallartitsivoq.
2. Naammagittaalliuutip suliarineqarnissaa itigartitsissutigineqarpoq, Ombudsmandi suliap sukumiinerusumik misissornissaanut pisinnaatitaanngimmat. 
   
3. Naammagittaalliuutip suliarineqarnissaa allanik pissuteqartumik itigartitsissutigineqarpoq. 
   
   

1. Ombudsmandi misissuinermik sukumiinerusumik aallartitsivoq

Naammagittaalliuut sukumiinerusumik misissorneqassasoq Ombudsmandi isumaqaruni naammagittaalliuut oqartussaasumut naammagittaalliuutigisamut ingerlateqqillugu nassiutissavaa, oqartussaasorlu qinnuigalugu naammagittaalliuut pillugu oqaaseqaateqaqqullugu, pisariaqarpallu apeqqutit allat pillugit nassuiaateqaqqullugu. Ombudsmandimit allagarsissaatit, tassanilu nalunaarfigineqarlutit oqartussaasoq naammagittaalliuutit pillugu oqaaseqaateqaqqullugu Ombudsmandip qinnuigisimagaa.

Oqartussaasup oqaaseqaanni Ombudsmandimut nassiutereerpagu oqaaseqaatit amerlanerusut pissarsiariniarneqassanersut Ombudsmandip isumaliutersuutigissavaa. Oqartussaasup oqaaseqaataa Ombudsmandip ilinnut nassiutissavaa, illit taanna pillugu oqaaseqaatinnik saqqummiussinissannut periarfissaqarsinnaaqqullutit.

Ombudsmandi oqaaseqaatit pisariaqartut pissarsiarereerunigit suliaq pillugu inaarutaasumik oqaaseqaateqarnissaminut piariissaaq, Ombudsmandilu inaarutaasumik oqaaseqaammi tassani paasinninnini pillugu nassuiaateqassaaq.

2. Naammagittaalliuutip suliarineqarnissaa itigartitsissutigineqarpoq, Ombudsmandi suliap sukumiinerusumik misissornissaanut pisinnaatitaanngimmat

Kinaassutsit ersertuullugu naammagittaalliorsimaguit naammagittaalliuutit Ombudsmandip sulairisinnaanngilaa.

Ombudsmandip naammagittaalliuut tamatuma saniatigut ilaatigut makku pissutigalugit suliarisinnaanngilaa:

• Naammagittaalliuut inummut, oqartussaasumut ingerlatseqatigiiffimmulluunniit Ombudsmandip inatsit tunngavigalugu suliarisinnaanngisaanut tunngasuuppat.

• Oqartussaasumut qulliunerusumut naammagittaalliornissamut periarfissaqaruit periarfissaq taanna atoreersimanngikkukku.

• Suliap ilinnut tunngasup kingullermik aalajangiivigineqarneranit ukioq ataaseq sinnerlugu qaangiutereersimappat.

Naammagittaalliuutivit suliarineqarnissaa itigartitsissutigiguniuk Ombudsmandip allaffigissavaatit, naammagittaalliuutit sooq suliarisinnaanagu nassuiaateqarluni.

Naammagittaalliuutivit suliarineqarnissaa ingerlatsinermi oqartussaasumut qulliunerusumut naammagittaalliorsimannginnerit pissutigalugu Ombudsmandip itigartitsissutigiguniuk naammagittaalliuutit oqartussaasumut nammagittaalliorfissaasumut eqqortumut ingerlateqqillugu nassiutissavaa.

3. Naammagittaalliuutip suliarineqarnissaa allanik pissuteqartumik itigartitsissutigineqarpoq

Naammagittaalliuutit tamaasa misissornissaat Ombudsmandip pisussaaffiginngilaa. Naammagittaalliuut misissuinermik aallartitsinermut pissutigissallugu naammannersoq Ombudsmandip nammineq aalajangissavaa. Ombudsmandi naammagittaalliuummi pineqartut ataasiakkaaginnaat suliariniarlugit aamma aalajangersinnaavoq (Ombudsmandi pillugu inatsimmi § 14, imm. 1).

Suliaq naammagittaalliuutivit suliarineqarnissaata itigartitsissutigineqannginnerani Ombudsmandip sukumiinerusumik naliliivigissavaa. Oqartussaasup suliami allagaatai (uppernarsaataatai) Ombudsmandip tamatumunnga atatillugu pissarsiariniarajuttartussaavai.

Oqartussaasup suliaq ilinnut tunngasoq eqqortumik suliarisimammagu Ombudsmandi ikiorsinnaanak ilimagalugu naliliiguni naammagittaalliuutivit suliarineqarnissaa itigartitsissutigissavaa. Naammagittaalliuutilli suliarineqarnissaa Ombudsmandip allanik pissuteqarluni aamma itigartitsissutigisinnaasussaavaa.

Naammagittaalliuutivit suliarineqarnissaa Ombudsmandip itigartitsissutigiguniuk naammagittaalliuut suliarniarnagu sooq aalajangernini pillugu nassuiaateqarluni allaffigissavaatit. Suliap ilinnut tunngasup qanoq ittuussusia apeqqutaatillugu suliami tamatuma kingornatigut qanoq iliorsinnaanersutit Ombudsmandip aamma ilitsersussavaatit.