Inatsit oqartussaasup suliamik ilinnut tunngasumik suliarinninnerminut atatillugu sumiginnarsimagaa imaluunniit allatigut kukkussuteqarsimasoq sumiginnaasimasorluunniit isumaqaruit Ombudsmandimut naammagittaalliorsinnaavutit.

Taamaattumik naammagittaalliuutit aalajangiinermut, assersuutigalugu qinnuteqaatip itigartinneqarneranut, aamma oqartussaasup ilinnik pinninneranut suliamilluunniit suliarinninneranut tunngassuteqarsinnaavoq. Pisortanimi oqartussaasut suliassat suliarineqartarnerat innuttaasunillu sullissineq pillugit malittarisassat arlallit malittussaavaat.

Piffissap suliamik suliarinninnermut atorneqartup sivisussusia, tassalu piffissaq oqartussaasup allakkannik akisiniarnerminut imaluunniit aalajangiinerminik ilinnut nalunaaruteqarniarnermini atugaa, aamma naammagittaalliuutigisinnaavat.

Oqartussat eqqarsaatigalugit pisinnaatitaaffivit ilaat tulliuttuni taaneqarput:

● Oqartussaasunut saaffiginnissutivit akineqarnissaannik piumasaqaateqarsinnaatitaavutit, kiisalu ataqqinnittumik mianerinnittumillu pineqarnissannik piumasaqaateqarsinnaatitaallutit.

● Aalajangiinermut tunngaviusup paasissutissiissutigineqarnissaa piumasaqaatigisinnaavat. Tassa imaappoq itigartinneqaruit tunngavilersuiffigineqarnissamik piumasaqaateqarsinnaatitaasutit.

● Oqartussaasup aalajangiinera allakkatigut tigugukku, aalajangiinerlu oqartussaasumut qulliunerusumut naammagittaalliuutigisinnaagukku oqartussaasup siulliup naammagittaalliornissamut periarfissamik aamma naammagittaalliuutip tunniunneqarnerani periaatsimik ilitsersussavaatit, matumani piffissaliisoqarsimappat piffissaliussaq ilanngullugu eqqarsaatigalugu.

● Suliami ilinnut tunngasumi allagaatinik aallaavittut paasitinneqarsinnaatitaavutit.

● Pisortani atorfeqartitaasut inatsit malittussaavaat, isiginiagassallu suliamut attuumassuteqanngitsut isiginiartussaanagit.