1. Kikkut naammagittaalliorsinnaappat?

Kinaluunniit Ombudsmandimut naammagittaalliorsinnaavoq, aamma nunani allamiut kiisalu suliffeqarfiit namminersortut suliffeqarfiillu allat.

Atit najugaqarfillu Ombudsmandip naammagittaalliuummik suliarinninneq pillugu nalunaarutiminik nassiussivigisinnaasaa naammagittaalliuutinni allassavatit.

Alla illit sinnerlutit naammagittaallioqqullugu qinnuigisimagukku naammagittaalliuutit Ombudsmandip suliarisinnaassappagu pineqartumut piginnaatitsissut illit atsiussavat. Piginnaatitsinermi immersugassaq una aamma atorsinnaavat. Piginnaatitsissut naammagittaalliuummut ilanngullugu Ombudsmandimut tunniunneqassaaq.

2. Ombudsmandimut qanoq iliorlutit naammagittaalliussavit?

Ombudsmandimut naammagittaalliorneq akeqanngilaq.

Ombudsmandimut oqaasiinnartigut allakkatigulluunniit naammagittaalliorsinnaavutit. Allannissannut periarfissaqaruit allakkatigut naammagittaallioqqullutit Ombudsmandip qinnuigissavaatit.

Qarasaasialerinermi isumannaallisaanermut tunngasut ilaatigut pissutigalugit filit linkitigut avataaneersutigut aasassat Ombudsmandip ammarneq ajorpai.

Ombudsmandimut allagaqarnikkut allakkatigut naammagittaalliussaatit. Naammagittaalliornermi immersugassaq una aamma atorsinnaavat.

Allakkavit aalajangersimasumik ilusilerlugit inatsisilerituutulluunniit oqaasertalersornissaat pisariaqanngilaq. Ombudsmandi nassuiaatiinnassavat oqartussaasoq (imaluunniit oqartussaasumi atorfeqartitaasoq) sorleq naammagittaalliuutiginiarit, aamma sooq naammagittaalliuutiginiarit.

Ateq, najugaqarfik allakkanik nassiussivissaq atsiornerlu

Aqqit najugaqarfiillu allakkanik nassiussivigineqarsinnaasoq tamatigut allattassavatit, allakkallu atsiorlugit. Kinaassutsimik isertuussilluni naammagittaalliuutit Ombudsmandip suliarineq ajorpai.

E-mailikkut faxikkulluunniit naammagittaallioruit allakkat assammik atsiorneqarsimassapput. Tassa imaappoq naammagittaalliuutit Ombudsmandimut e-mailikkut nassiukkukku nassiutinnginnerani assammik atsiornerup scannerneqarneranik ilassagit. Naammagittaalliiuut e-mailikkut assammik atsiorneqanngitsukkut nassiukkukku illit naammagittaalliortuusutit uppernarsaat assammik atsiorneqarsimasoq allakkatigut nalinginnaasutigut tamatuma kingornatigut nassiutissavat. Taamaaliortoqassaaq ilumut illit naammagittaalliortuunerit qulakkeerniarlugu.

Malugiuk Ombudsmandi e-mailikkut paasiuminaallisakkanik (tassa imaappoq e-mailinik imai allanngortillugit taamaallaat tigusisumit eqqortumik “matuersaatilimmit” atuarneqarsinnaasunngortitanik) tigusaqarnissamut nassitsinissamulluunniit periarfissaqanngimmat. Taamaattumik paasissutissanik isertuussassanik Ombudsmandimut e-mailikkut nassiussineq isumannaatsuunngilaq. Tamanna Ombudsmandip suliamik ilinnut tunngasumik suliarinninnini pillugu allakkaminik illit najugaqarfigisannut nassiussisarneranut aamma pissutaavoq.

Oqarasuaatikkut ilitsersuineq namminerlu orniguttunik ilitsersuineq

Qanoq iliorlutit qanorlu annertutigisumik allannissat nalornissutigigukku Ombudsmandimut sianersinnaavutit oqarasuaatikkullu ilitsersorneqarlutit. Nammineq ornigullutit Ombudsmandi taassumaluunniit sulisuisa ilaat aamma oqaloqatigisinnaavat.

Naammagittaalliuutit uunga nassiutissavat

Inatsisartut Ombudsmandiat
Postbox 1606
3900 Nuuk

Fax: (+299) 32 16 87

Uunga ornigullutit saaffiginnissinnaavutit

Inatsisartut Ombudsmandiat
Noorlernut 53
3900 Nuuk

Piffissani ukunani allaffiup ammanerani ornigulluni oqarasuaatikkulluunniit saaffiginninnissamut periarfissaqarpoq:

Ataasinngorneq:   10.00-14.00
Marlunngorneq:    10.00-14.00
Pingasunngorneq: Matoqqavoq
Sisamanngorneq:  10.00-14.00
Tallimanngorneq:  10.00-14.00

Oqarasuaatip normuanut uunga sianersinnaavutit: (+299) 32 78 10